Gabinete Mike Eman II ta declara Prikichi nos parha nacional Brindando balor y conservacion

Recientemente, Conseho di Minister di Gabinete Mike Eman II a tuma decision cu e especie endemico di prikichi ta bira oficialmente e parha nacional di Aruba.

E anuncio aki Minister Presidente a hacie publico diasabra ultimo durante encuentro cu, e. o. Aruba Birdlife Conservation (ABC). Premier Eman a expresa di ta sinti un satisfaccion hopi grandi di por a contribui na e paso importante aki pa preservacion di un specie di bestia cu ta haya solamente na Aruba.

 

Naturalmente e noticia a haya un bon bini masha positivo mes ya cu e declaracion ta proporciona na e specie di parha aki balor y proteccion. Actualmente, e prikichi Arubiano ta conoce un caida considerabel di e cantidad loke por catolog’e den peliger di extincion.

President di ABC, Greg Peterson, ta felicita Gobierno di Aruba pa e decision sabio cu a tuma. Adicionalmente, e organisacion a haya peticion Gabinete Mike Eman pa bin cu un propuesta pa rescata y aumenta e poblacion di prikichi na Aruba.

 

Prome Minister Mike Eman a expresa di a haya un punto di bista mas amplio y profundo di naturalesa y e balor cu esaki tin pa un pais danki na e experiencia cu el a comparti cu e delegacion Arubano cu a participa recientemente den e Risaralda Bird Festival na Pereira, Colombia y cu e tabatin e honor di encabesa.

 

Relaciona cu e evento, diasabra ultimo, organisadornan a haci entrega di un certificado na e participantenan, a gradici patrocinadornan local cu a haci e biahe posibel y tambe a presenta un serie di fotografia di Prikichi na Premier Eman como muestra di aprecio pa su sosten.

Minister President Eman tabata presente na e encuentro hunto cu su sra. Doina, Secretaria di Conseho di Minister sra. Nicole Hoevertsz, directiva y boluntarionan di ABC, directiva di Aruba Trade & Industry Association (ATIA) y mucha y mayornan cu a bay Hulanda.

Top