Gang kier a bati hoben na Sabana Basora

Dialuna anochi presencia di Polis ta wordo pidi na un adres na Sabana Basora, unda un gang, sea di Pos Chiquito of Sabana Basora, kier a bati un hoben.

Na e sitio e patruye di San Nicolas ta papia cu e señora A.A., kende ta declara cu tres mucha homber a yega eynan en busca di su yiu homber. Un bisiña a conte cu el a mira un auto blanco ta core sospechoso den e bisindario. Despues el a constata cu di repente tres mucha homber a baha for di e vehiculo y a core direccion di e cas unda asistencia a wordo pidi.

Un di e mucha hombernan a bula e cura y a bay direccion di yiu homber di e denunciante.

E funcionarionan policial a pidi e señora pa nan papia cu su yiu pa tuma su declaracion.

E mucha homber a bin pafo y a conta cu enberdad tres mucha homber a yega dilanti su cas y un di nan a bula drenta e cura. E mucha homber en cuestion a cuminsa bringa cune y a trata di dal’e cu un piedra. E no a logra mira cara di e mucha hombernan. E Polisnan a puntre su e por tin problema cu algun persona. El a bisa cu e unico problema cu e tin ta cu e gang di Pos Chiquito y Sabana Basora Noord.

E Polisnan a controla den bisindario, pero no a topa ni cu e auto ni cu e tres hobennan. Tanto Central di Polis como Flex Team a wordo poni na altura di e  caso aki.

Leave a Reply

Top