Gerencia ta trahando riba expansion pa por acomoda e demanda di awe

Jurgen Benschop, COO di Aeropuerto Reina Beatrix a confirma cu nan ta trahando riba expansion di nos aeropuerto, debi cu e movemento den aviacion y pasaheronan a crece drasticamente.

Na 2016, Aeropuerto a procesa casi 3 miyon pasahero, dunando indicacion cu si sigui asina, Aeropuerto di Aruba ta birando chiquito.

 

E aeropuerto actual a keda diseña, cu e proyecto titula: Beatrix 2000, cu e meta pa acomoda y procesa 2.3 pa 2.4 miyon pasahero, loke por a constata caba cu aña ya Aruba a surpasa e cantidad di pasahero.

Segun Jurgen Benschop, esaki kier men cu lo cuminsa na afecta e nivel di servicio p’e usuarionan y manera e situacion ta, Aruba no por acomoda tur n’e orario cu nan kier.

 

Dor di esey a cuminsa traha riba un plan pa expande Aeropuerto, cu a ser yama: “Gateway 2030”, p’asina por acomoda e demanda di awe y p’e siguiente 15 pa 20 aña nos dilanti pa garantiza cu nos lo crece como Aeropuerto pareu cu e crecemento di nos pais, segun e COO di AAA N.V., Jurgen Benschop.

 

Ya caba nan a cuminsa cu e rampa prome, unda ya caba a construi 2 rampa, uno parti pariba di Aeropuerto y e di dos parti pabao banda di Aerocargo y e aña aki lo bay na conecta e dos rampanan aki pa despues cuminsa na expande cu e fase di expansion di e terminal.

E expansion di e terminal lo bay ensera e.o. e checking area n’e parti di e US Terminal, cu lo bira un Common Checking Area.

Manera e ta awor nos Aeropuerto ta dividi den un parti cu ta bay Merca y e otro, unda e pasaheronan cu ta bay pa otro destinacionnan.

 

Cu e cambio nobo, AAA N.V. kier bin cu un solo checking area, caminda e.o. tur maleta ta pasa den un sistema automatisa di seguridad, cu lo screen tur maleta. Y e ora ey tambe lo wordo separa, dependiente cua destinacion nan ta bay.

Esnan cu ta bay Merca, ta bay den un holding area, te ora cu CBP, cu t’e Pre-Clearance Mericano clear e maletanan y lo bay pe avion.

 

Segun COO, Benschop, esaki lo bay na elimina cu e pasahero mester bolbe bay na recolecta su maleta pa check in n’e Imigracion Mericano. E proceso aki lo haci’e hopi mas liher y sigur p’e pasahero.

 

MAS GATE

AAA N.V. tin pensa den su expansion pa expande Aeropuerto cu 3 pa 4 gate mas cu brug, y esaki ta pa por acomoda e buelonan cu ta bay Merca.

Manera ya ta conoci, debi n’e servicio di Pre-Clearance cu Aruba tin, tur buelo cu sali for di Aruba pa cualkier ciudad Mericano, e pasaheronan mester keda steril. Loke nifica cu e pasaheronan aki por tin contacto cu otro pasahero.

 

AAA N.V. ta bin cu full un programa nobo cu ta yama Concession Area, cu ta un style di food-court cu bo ta haya na shopping mallnan na Merca, unda tur restaurant y shopnan ta hunto, p’e pasaheronan por sinta of haci nan ultimo shopping wardando riba nan buelo.

 

Di acuerdo cu Jurgen Benschop actualmente nan ta den fase di diseño di e expansion y nan ta kere cu pa 2018 cuminsa cu e prome trabaonan di construccion.

Prome cu cuminsa cu e construccion, tin varios otro trabao cu mester tuma lugar manera e.o. e relocation di electra, e transformator huis, tankinan di awa, etc., esta cosnan cu ta na lugarnan unda e construccion mester tuma lugar.

Pesey na final di 2018, cuminsa cu e fase grandi di expansion.

 

PIEK HOURS

Actualmente e piek hournan di Aeropuerto ta diabierne, diasabra, diadomingo y dialuna for di 11 or di mainta te cu 5 or di atardi. No tin mas lugar pa acomoda ningun buelo, sigur cu tin cu bay Merca.

Si tin buelo for di e oranan menciona, sigur Aeropuerto lo por atende nan, pero ningun compania no ta gusta e oranan cu tin gate habri.

Unabes cu e expansion ta cla, sigur Aruba lo por acomoda mas buelo, dunando tur servicio desea, sin cu mester transporta pasahero cu bus.

 

Aruba tin e Pre-Clearance mas bieu, pero si bay na mehora e servicio aki, e lo bay habri posibilidad pa mas compania cu kier bay Merca haci uso di e Pre-Clearance, cu lo haci’e facil facil p’e propio pasaheronan, segun Jurgen Benschop, COO di AAA N.V.

Leave a Reply

Top