Gerente General di WEB Aruba N.V. Luis Oduber: Modernisacion no kier men, retiro di trahador, pero pa mehora servicio na clientela Y sigui traha pa haci WEB mas sostenible

Bao di e trahadornan di WEB Aruba N.V. tin cierto tension debi na rumor cu ta circula atrobe, cu gerencia di WEB Aruba N.V. ta trahando pa modernisa e planta di produccion di awa y coriente y esaki finalmente lo tin como consecuencia retiro di trahador.

Relaciona cu e rumornan aki, a tuma contacto directo cu e Director General, Luis Oduber, kende a admiti cu WEB Aruba N.V. a tuma e caminda for di algun aña caba pa inovacion pa mehora eficiencia y asina garantisa suministro di awa y coriente.

Pero den forma categorico Luis Oduber a desmenti cu esaki lo bay cu retiro di trahadornan na WEB Aruba N.V.

 

Si tuma como algun tempo atras, ningun hende no tabata sa di telefon mobile, a cuminsa traha cu pager, y asina despues cu telefonnan grandi y awendia mayoria ta cana cu un smartphone. Mescos e ta na WEB Aruba N.V. unda nan tambe ta bay cu tecnologia modern. Pero esey no ta ensera di retiro di ningun trahador.

Segun Luis Oduber, e ta bin ta sinta cu grupo chiquito, enbes di sinta cu grupo grandi, unda berdad e ta splica e cambio y direccion cu WEB Aruba N.V. ta bayendo. Semper y cuando esnan cu ta atende sesionnan aki tin tur oportunidad pa haci tur clase di pregunta.

 

Berdad cu automatisacion ta yuda hopi, ta bira mas eficiente, pero no ta bay remplaza nada. Ademas edad di pensioen ta subi pa nan tur y como tal WEB Aruba N.V. mester di e trahadornan aki tambe.

Ademas e automatisacion aworaki ta mas pa yuda e consumidor, mientras cu e operacion di henter e planta ta keda cu obra humano. Y e mantencion cu mester keda tuma lugar, splicando esaki, ta dificil pa pensa mes na bay over na retira hende.

Ni ki tecnologia cu bin cune, mester di ser humano pa opera e planta, segun Luis Oduber.

 

SOSTENIBILIDAD

Berdad ta cu ora ta papia di sotenibilidad, e ta trece cune hopi automatisacion. Lo bay na usa mas energia di biento y di solo y ningun hende por predeci kico ta bay sosode. Anto ta logico cu lo pensa riba automatisacion, segun Luis Oduber, pa ningun consumidor sali perhudica ora di cualkier interrupcion.

 

Ademas ta concentra hopi riba automatizacion di eficiencia. Logando esaki, sigur pueblo lo sali beneficia, segun CEO di WEB Aruba N.V. Aworaki ta dificil pa cuantifice kico lo bira e beneficionan.

Logico WEB Aruba mes den su strategia ta papia di “cleaner”, “greener” y “fuel-oil free”.  Y como tal WEB Aruba N.V. lo sigui busca tecnologia mas sostenibel, mas limpi, pa tin menos efecto riba nos medio ambiente.

Y aki solo, biento ta fit den e strategia aki, segun Luis Oduber y semper den dialogo cu Utilities N.V., N.V. Elmar, WEB Aruba N.V. lo sigui traha riba esakinan.

 

 

 

Top