Giancarla Lobbrecht a defende su tesis na Universidad di Aruba

Diahuebs 18 di mei 2017, Giancarla Lobbrecht a defende su tesis como e di 14 studiante di e programa di e estudio ‘Organization, Governance and Management’ (OGM) na Universidad di Aruba.

Giancarla a defende su tesis dilanti di e comision di graduacion cu tabata consisti di sra. Judelca Briceno, sr. Jacques Verscheer y sr. Anthony Lee- Riviears.

E presentacion y defensa di e tesis a tuma lugar dilanti di un audiencia mixto di famia, studiante y docente di Universidad den aula di Universidad.

 

Durante e periodo como estudiante na Universidad di Aruba, Giancarla Lobbrecht a bira interesa den tematicanan cu ta regarda Human Resource Management.

Giancarla tabata interesa den e tema di absentismo halto cu ta existi den sector publico. Den su tesis el a compara e datonan di sector publico cu datonan di sector priva na Aruba.

E tabata especificamente interesa den e factornan cu ta conduci n’e nivel di e absentismo aki. Giancarla Lobbrecht su tesis tin como titulo: “Absenteeism in the Public Sector: A study on factors relating to high absenteeism among employees in the Public sector”.

 

Durante su investigacion Giancarla a explora den ki forma factornan relata n’e trabao mes y/of famia tin efecto riba e absentismo den sector publico.

Pa medio di un cuestionario Giancarla a analisa kico e efecto di e diferente factornan aki tin riba e absentismo den sector publico.

E resultado di su investigacion ta uno masha importante mirando cu e por wordo usa como un instrumento pa adapta e leynan y maneho riba tereno di absentismo den sector publico.

 

Universidad di Aruba, particularmente e departamento di ‘Organization, Governance and Management’, ta felicita Giancarla Lobbrecht cu e logro aki y cu su decisión pa bay haci un “Summer course; Project management” na “The University of Applied Sciences Utrecht” (HU). Giancarla a scoge concientemente pa haci e modulo extra y e ta bay tin bon probecho di e desicion aki den su futuro carera y ora e bay solicita.

Pa mas informacion riba e estudio OGM, bishita e website di Universidad di Aruba na http://www.ua.aw/OGM y/of e pagina di Facebook cual ta https://www.facebook.com/pages/University-of-Aruba-OGM-Organization-Governance-Management-FAS/

 

Top