Gisele-Mireille Sint Jago (UPP): Diversifica nos economia cu e. o. Industria Creativo (parti 1)

UPP den su programa pa gobernacion 2017-2021, mescos cu e den e acuerdo di lista combina PPA/UPP, ta para pa diversificacion di nos economia, basa riba un diversificacion di industria hi-tech y limpi y cu no ta trabou intensivo, segun Mireille Sint Jago.

 

Den e cuadro aki ta interesante pa mira diversificacion di nos economia cu e industria creativo. Na aña 2012 e Gobierno di Trinidad y Tobago desempleo tabata na 5%. Na 2013 nan a introduci un compania statal di Industria Creativo.

Na 2016, aunke desempleo den e industria petroleo subi, T&T ainda a logra e cifra di desempleo mas abou den Caribe.

Un di e metanan di diversificacion di industria ta, pa baha e desempleo na Aruba y asina percura pa nos ta menos vulnerabel pa cualkier fluctuacion den e industria di turismo. Esaki nos por logra dor di diversifica economia atraendo industria nobo, manera Industria Creativo, Sint Jago ta splica.

 

Conforme e Labor Force Survey 2015 e cifra oficial di desempleo na Aruba tawata 7.4%. Compara cu Curacao (11,7%) y Bahama’s (14,8%) esaki ta basta bon. Compara cu Trinidad y Tobago (3,5%) y Bermuda (6,6%) y Hulanda 5% tin hopi espacio ainda pa baha e cifra aki.

E proximo Gobierno lo mester haci hopi mas esfuerso pa crea empleo y entrada na Aruba. Locual Aruba tin mester di dje mas cu tur, ta trabou y trahadornan cualifica pa haci e trabou. Nos tur por bay di acuerdo cu esey. Trabou ta trece structura den un bida y beneficionan medico y pa cu salud.

Ademas, trabou ta preveni cu un persona lo recuri na criminalidad, Sint Jago ta mustra.

 

Arte tin un efecto positivo rib’e desaroyo di un mucha y e ta un manera cu hobennan ta uza pa expresa nan mes cu n’e, e lo ta importante pa nos realisa cu esaki no ta solamente un manera pa diverti, pero e ta un industria riba su mes cu lo por crea empleo sin limite y rond mundo pa esnan na Aruba.

Pa logra esaki, nos lo mester cuminsa manera a wordo haci na Trinidad y Tobago cu un compania estatal, cu ta crea productonan p’e mercadeo di turismo pa bende global, pero cu tambe ta educa. E placa cu ta wordo genera cu e Compania Statal di Industria Creativo, lo mester wordo uza pa paga p’e programanan educativo di kleuter, scol basico te cu educacion profesional, Sint Jago ta continua.

 

Algun aña atras nos tabatin un Film Festival, un proyecto cu a wordo lansa dor di e millennial Jonathan Veira. E parti bunita di e proyecto multidisciplinario aki, tabata e tayernan educativo cu a wordo ofreci na nos hobennan durante di e Film Festival. Awendia Aruba conoce diferente festival di musica y fashion, pero e parti educativo ainda falta. Nos tin cu wak y reconoce e recursonan cu nos pais tin: Nos Pueblo. Un pueblo unico cu ta conoci pa su creatividad den tur areanan.

Si nos uza locual ya caba nos tin, pa logra locual nos kier, nos lo por ta un pais y un pueblo mas exitoso, Sint Jago ta indica.

 

E lista combina PPA/UPP lo percura e. o. dor di bini cu solucionnan pa baha desempleo. Asina nos lo percura pa Aruba bira e patria cu nos tur ta anhela di tin y kier laga pa nos yiunan.

Ta p’esey e ta sumamente importante pa dia 22 di september, nos vota consciente. Pa mi, esey ta primordial. Nos mester laga idealismo vence materialismo.

Ban uni y habri porta pa Un Miho Mayan! Asina Sint Jago ta conclui.

Top