GKMB eherciendo control preventivo pa sangura Aedes Aegypti

 

Clayton Croes, e “Beleidsmedewerker” di Directie Volksgezondheid (DVG) y Hefe suplente di Gele Koorts Muskieten Bestrijding (GKMB), a informa cu nan ta controlando rond di nos isla.

“Esaki t’e parti grandi di control preventivo pa nos haya e indexnan pa tin un bista di e cantidad di sangura riba nos isla. Durante e controlnan aki nos a haya diferente problema pa loke ta regenbakken (receptornan di awa).

 

Clayton Croes a sigui splica cu GKMB tin un total di 13 tarea cu nan ta cumpli cune pa medio di e plan nacional di accion riba cual nan ta basa nan trabao… “y esaki ta un di e tareanan y e ta birando un problema e ultimo añanan”.

GKMB tin un total di 2000 regenbak registra. Esaki ta un registro di hopi aña caba… “y tambe nos a ripara cu hopi di esaki a wordo elimina y tin otronan cu ta nobo.

Regenbak cu den pasado no tabata wordo uza y a wordo reconstrui, awor ta den uzo atrobe.

E ta haci’e un poco dificil pa tin un bon registro riba nan”, Clayton Croes a splica.

 

“Durante e control aki nos a tuma nota cu ta hayando criadero di sangura Aedes Aegypti den  regenbak, dus criadero di e sangura cu ta causa Dengue, Chikungunya y Zika. Si pensa bon, un regenbak ta un criadero gigante cu ta percura pa produci un cantidad di sangura y na mesun momento un gran molester di sangura”, el a agrega.

 

GKMB kier pa doñonan di cas cu tin regenbak, pa sea asina amabel di tuma contacto cu GKMB na telefon 585-5533 p’asina nan por haya sa kende t’e doñonan di cas cu tin regenbak… “y p’asina na mesun momento por atende cu esakinan tambe dor di splica nan cu si e regenbak ta den uzo con pa evita problema di sangura.

Si nan ta colecta awa cune kico pa haci p’e no bira un criadero gigante di e sangura Aedes Aegypti”.

 

GKMB tin diferente producto y por splica e doñonan di cas cu regenbak e forma corecto di uzo y prevencion, como tambe duna e doño di cas informacion riba kico e mes por haci durante aña si no ta uza e regenbak.

Un tip facil ta pa kita tubo y tapanan pa stop di colecta awa inecesariamente. Asina e lo no causa molester”, e experto a splica.

Tambe por haya productonan di diferente tipo na companianan di pest control y tiendanan unda ta bende mata.

Aki por haya loke ta wordo yama “Mosquito Donuts”. Asina bo ta sigur cu bo regenbak no ta causa peliger pa salud publico, sigur rond di bo cas y pa bo sernan keri.

 

“GKMB ta uza maneranan mas green posibel. Den pasado esun mas facil y economico tabata e uzo di kerosin, pero awendia tin diferente alternativa p’esaki.

P’esey nos ta inverti hopi mas den mihor productonan pa medio ambiente cu ta biodegradabel, esta e producto BTI cu nos ta uza den zona ambiental”, di acuerdo cu Clayton Croes.

Productonan completamente biodegradabel ta basa riba un bacteria di naturalesa cu ta haya den tera solamente.

Den laboratorio ta produci esaki di un forma concentra. E bacillus thuringiensis israelensis ta forma toxina pa proteha su mes asina e bin den contacto cu awa y esaki ta un delicatese p’e larvanan di sangura.

 

“E ta un manera hopi nechi pa deshaci di larva di sangura y na mesun momento hopi specifico tambe. E ta diseña solamente pa mata larvanan di sangura y mesora proteha abo doño di cas contra e sangura y na un manera hopi consciente ta preveni e sanguranan aki”, Clayton Croes a acentua.

E manera mas crioyo cu semper GKMB tabata para p’e y ainda ta boga p’e, danki n’e bon cooperacion cu e doñonan di cas cu tin regenbak grandi activo, ta uza e pisca chikito guppy. E pisca aki t’e forma di mas nechi cu tin pa deshaci di larvanan di sangura. E larvanan aki ta un delicatese pa guppys.

 

“Si bo tin un regenbak y bo tin guppys den dje bo por ta sigur cu bo no tin problema cu sangura.

GKMB tin poco disponibel pa parti cu e casnan cu tin regenbak. Durante secura hopi regenbak a seca y tin scarsedad di guppys, pesey GKMB ta pidi esnan cu tin regenbak y tambe tin guppys pa notifica nos pa yuda parti esaki pa tur esnan cu kier haci uzo di e metodo aki”, asina Clayton Croes a expresa.

 

E experto den combatimento di sangura a termina bisando cu e mision di GKMB ta pa proteha pueblo di un banda y di otro banda educa pueblo dunando informacion necesario n’e doñonan di cas riba kico nan mes por haci.

“Y esaki ta cuadra completamente cu e vision di Directie Volksgezondheid pa nos tin un comunidad responsabel pa nan mesun salud.

Nan tin den nan man e informacion y conocemento pa nan mes por proteha nan mes y cuida nan salud”.

 

 

Top