GKMB y un grupo di expertonan ta trahando hunto pa logra haya diagnosticonan corecto

Tanten cu e investigacion ta tumando luga, ta pidi pa sigui inspecta curanan di cas y den cas, como tambe rond y den negoshinan pa posibel criadero di sangura y pa elimina esakinan, director di DVG, esta Jerry Staring a bisa enfaticamente.

 

El a comenta cu tin un grupo di experto den e Vector Action Team cu ta consisti di personal di GKMB, personal medico, expertonan di laboratorio, expertonan riba tereno di enfermedadnan contagioso ta trahando hunto pa logra haya sa mas y haya un diagnosis corecto di e casonan di e fever-rash syndrome.

Pero sea cua sea e origen, ta esencial pa comunidad sigui alerta pa eliminacion di criadero como cu si e ta transmiti pa sangura of no, hecho ta cu a yobe hopi ultimamente y no por perde for di bista cu aedes aegypti tin un impacto negativo den nos comunidad, y ta hunto cu cada miembro di comunidad, cu yudansa di cada residente di nos isla, so lo yega na e miho control di e indexnan.

 

Dr. Wilmer Salazar a splica cu e rash ta bin cu masha poco sintoma, e ta cuminsa na e cara of e pecho y ta sigui plama; e ta grawata. E keintura ta suave, no mucho halto y pashentnan tambe ta sinti un tiki dolor di curpa of joints. E sintomanan ta dura apenas tres pa cinco dia y despues e persona ta bira bon.

Loke ta preocupa ta cu e sintomanan ta similar na e virusnan causa pa sangura. Ta mirando mas den e direccion di Zika como cu no ta presenta sangramento y otro complicacion cu ta bin cu dengue, Salazar a añadi.

Pero, mester agrega cu e sintomanan tambe por ta indicacion di afliccionnan manera Parvo Virus, Rubella, Measles, etc. y mester sigui haci investigacion pa determina exactamente kico e ta.

 

Dr. Salazar tambe ta subraya e importancia di control di e cantidad di sangura cu ta transmiti e virusnan ya conoci. Mester sigui cu e lucha contra e sanguranan di pata preto/blanco.

El a splica cu den tur caso mester preveni e presencia di Zika, como cu e ta un virus cu ta trece problema grandi cun’e como cu e ta “neurotropo”, pues e ta afecta e celnan di e celebro, cual por tin cierto consecuencia. Ta comenta tocante di Microcefalia, pero tin otro daño na celebro cu por tuma luga tambe cu no ta Microcefalia y nan no por wordo detecta na tempo.

E team di DVG ta trahando duro pa combati e problematica aki, Staring a expresa.

 

Conscientisacion encuanto di e situacion ta sigui, como tambe conscientisacion encuanto di eliminacion di criadero. E situacion cu ta reina bao di e populacion berdad ta trece un poco stress y miedo, pero dokternan y e sistema di salud na Aruba ta bon y ta pidi pa tur pashent y dokternan sigui meld e condicion aki pa por yega na un diagnosis corecto.

DVG ta pidi dokternan di cas y laboratorionan pa sigui notifica DVG y pa pashentnan sigui meld na nan dokter.

E situacion cu ta reina bao di e populacion ta trece un poco stress y miedo, pero nos dokternan y e sistema di salud ta bon. Ta atendiendo cu e situacion aki cu hopi seriedad pa asina logra un Aruba cada dia un poco mas saludabel y un poco mas sigur. VAT: Vector Action Team.

 

Aruba su Vector Action Team, esta VAT ta un grupo di trabao y plataforma importante cu ta envolve tur grupo di interes (stakeholder) den e proceso pa combati malesanan transmiti pa sangura. VAT ta dialoga y sincronisa datonan di unda a haya criadero y unda tin casonan sospechoso y/of confirma pa por traha di un forma eficiente y profesional basa riba informacion adkiri y colecta.

VAT ta basa riba e maneho recomenda pa Pan American Health Association (PAHO)/World Health Organization (WHO) pa cu e maneho integra di vector (sangura cu ta transmiti un virus), esta “integrated vector management”.

 

Combatimento di sangura ta mundialmente un di e luchanan mas grandi y dificil pa salud publico. E ta un problematica mundial, como cu e sangura ta adapta relativamente facil na diferente medio ambiente, y ta sigui transmiti virusnan di pais pa pais, region pa region. E problema aki tin hopi atencion di PAHO/WHO practicamente tur parti di mundo.

Aruba su capacidad pa combati sangura ta reconoci den nos region como un di e mihonan, y como isla mester tin confiansa y ta orguyoso di e trabao duro cu inspectornan di GKMB ta eherce tur dia, y e tremendo cooperacion entre departamentonan cu ta haci esaki posibel, Clayton Croes a conclui bisando.

Top