Glenbert Croes: Gobierno nobo di MEP lo elimina parkeermeters, elimina klem y habri Caya Betico Croes bek pa trafico inmediatamente

Durante e tratamento di e reunion referente e acusacionnan grave contra e Minister di Trabou di AVP unda Fraccion di AVP a pidi pa agrega e agenda di Criminalidad, nos di Fraccion di MEP tendiendo e grito di Comercio den Playa y nan trahadornan a entrega un mocion den Parlamento pa inmediatamente elimina parkeermeters, elimina klem y habri Caya Betico Croes bek pa trafico.

 

“Lamentablemente ta e Parlamentarionan di MEP ta uniconan cu a sostene e mocion cu Fraccion di MEP a entrega pa votacion al respecto, pero alavez no obstante cu Minister Presidente Mike Eman a duna Comerciantenan na Playa y nan trahadornan e palabra cu ta elimina esakinan, Fraccion di AVP ta vota contra e mocion di MEP pa elimina parkeermeters, elimina klem y habri Caya Betico Croes immediatamente”, segun Glenbert Croes.

 

“Nos di MEP ta convenci cu dor di e construccion den y rond di Caya Betico Croes cu a tuma mucho tempo, haci e trafico unicamente pa tram den Caya Grandi, y pa remata e introduccion di Parkeermeters, boet y klem, Gabinete Mike Eman y Partido AVP a mata Playa.

 

Gobierno di AVP por purba busca tur excusa, pero e tarea di Gobierno di AVP ta: tende Pueblo su dolornan, tende esnan concerni nan dolornan y actua pa yuda nan.

Tin mas di 50 tienda cu a cera den Playa y Caya Betico Croes. Nan a kita trahadornan for di trabao pasobra nan a cera nan portanan. E tiendanan grandi cu a keda tambe ta na rand di cera nan portanan corda awo e tiendanan chikito”, Croes ta splica.

 

“Gabinete Mike Eman y Fraccion di AVP a haci dimas dor di keda tene na e proyecto capricho di AVP cu ta e parkeermeters. E momento a yega pa: revoca y elimina parkeermeters, elimina klem inmediatamente y habri caya Betico Croes bek pa trafico inmediatamente.

 

Alavez nos mester constata door di e falta di un maneho economico moderno y progresivo pa full Aruba, e comercio den centro di cuidad na San Nicolas tambe ta pasando mal momento. Negoshinan den mallnan grandi y mallnan chikito tambe ta bayendo malo.

Pero ta parse cu Gobierno so no ta mira e situacionnan ey. P’esey ta momento pa nos como Pueblo dicidi Hunto P’e Cambio…#sinmiedo 22 di september proximo”, Glenbert Croes ta termina.

Top