Glenbert Croes (MEP): Gobierno kier sigui endeuda WEB, ELMAR Airport SETAR APA y RDA pa malgasta e placa den campaña

Parlamentario di MEP, sr. Glenbert Croes a manda un mensahe pa tur e NV nan di Gobierno na unda e ta alerta nan pa no coopera cu e maneho di Gabinete Mike Eman pa saca masa placa p’asina Mike Eman malgasta e placa den e proximo campaña.

 

“Nos ta desea di manda un mensahe di conseho y alerta pa tur e NV nan di Gobierno, pero principalmente: WEB N.V., ELMAR N.V., AAA N.V., SETAR, APA N.V., y RDA N.V. pa no coopera cu Gabinete Mike Eman su intento pa saca mas placa di dividendo, pero alavez poniendo tur e companianan aki di pueblo endeuda nan mes mas ainda pa duna Gobierno mas placa cu sin duda lo wordo malgasta den e campaña proximo.

 

Nos kier alerta principalmente e gerencianan, hunta directiva y principalmente nan sindicatonan, pasobra si Gabinete Mike Eman logra saca e placa aki di e NV nan di Gobierno esaki lo wordo derocha, mientras cu e unico proposito di Gabinete Mike Eman ta pa sigura cu e Gobierno nobo di MEP no haya niun placa den caha di Gobierno ora cu e Gobierno nobo wordo eligi 22 di september proximo cual lo haci e problemanan pa resolve aun mas grandi”, segun Glenbert Croes.

 

“Nos a compronde cu for di WEB so nan kier saca alrededor di 50 miyon florin, cual lo ta devastador pa WEB. Pasobra e lo afecta e solides financiero di WEB. E capacidad di WEB pa cumpli debidamente cu e CAO vigente cu tin cu tur e trahadornan di WEB, y cu como consecuencia esaki lo pone cu WEB lo mester bolbe hisa prijs di awa y coriente matando nos pueblo djis pa cumpli cu antoho di malgasto y mas endeudamiento di parti di Gabinete Mike Eman.

 

Esaki ta inaceptable, iresponable y inhusto pa cu nos pueblo, y Partido MEP ta urgi Gerencia, Sindicato y Hunta Directiva di WEB, ELMAR, AAA, APA, SETAR y RDA pa no coopera cu e asunto aki. Nos ta urgi tambe pa tuma tur paso cu por wordo tumá cu forza contundente pa no permiti mas crimen wordo cometi.

 

AVP a endeuda Aruba y nos pueblo. AVP a zink Aruba y nos pueblo. AVP ta matando futuro di tur e yuinan di nos Pueblo. Awor nan kier caba di kibra tur e NV nan di Gobierno y pueblo tambe? INACEPTABLE”, e Glenbert Croes a termina bisando.

Leave a Reply

Top