Glenbert Croes : MEP lo presenta plan pa construccion di cas pa tur famianan wardando pa tereno na DIP y na FCCA pa cas

Durante e ultimo añanan, sr. Glenbert Croes di Partido MEP a bin ta scuchando e necesidadnan y preocupacionnan cu ta biba den e pueblo di Aruba. Un necesidad grandi cu hopi famia ta enfrenta ta e falta di un propio cas y of e facilidad di haya tereno pa asina nan por cuminsa traha nan cas.

 

“E siguiente proyecto den cual lo mi hinca tur mi empeño ta pa bin cu un plan pa construccion di casnan pa tur famia cu ta wardando añanan pa tereno na Domeinbeheer/DIP y tur famia wardando pa un cas di pueblo na FCCA”, segun Glenbert Croes.

 

“Ora cu nos di MEP ta critica e corupcion cu tereno di nos pueblo unda cu nos ta mira Gobierno di AVP privilegia y recompensa e grupito di corupcion rond di AVP cu ta haci negoshi y te awor ta sigui haci negoshi cu tereno di pueblo, mientras cu tin 3000 famia wardando pa cas di pueblo na FCCA, mientras tin 10.000 famia wardando añanan caba pa tereno na DIP/Domeinbeheer, ta pasobra e ta haci nos dolor mira con Gobierno di AVP ta bira lomba pa e necesidad fundamental di nos pueblo pa tin su propio cas pa su famia”, sr. Croes ta splica.

 

“Cu certeza nos kier confirma na henter nos digno pueblo, cu e Gobierno nobo di MEP lo bay revoca/elimina tur e terenonan mal duna cu proposito unicamente di wordo rebendi, p’asina nos re-destina e terenonan comercial pa traha cas pa pueblo, y p’asina nos percura pa tur famia cu ta wardando pa un tereno pa traha nan cas finalmente haya nan tereno y cas”, sr. Croes a continua bisando.

 

“Nos plan lo ta encera tambe pa nos traha di cerca cu famianan y personanan cu ta doño di terenonan eigendom pa hunto nos desaroya e terenonan aki cu e proyecto di construccion di cas pa pueblo.

Nos ta di opinion cu FCCA mester hunga un rol importante den esaki, pero pa impedi retrasonan inecesario, e proposicion di MEP ta pa bin bek cu e Banco di Desaroyo/Banco di pueblo cu lo percura pa hypotheek na condicionnan sumamente faborable pa pueblo p’asina tur famia humilde por yega na ta doño di su propio cas”, sr. Croes a enfatisa.

 

“AVP den 8 aña a haci negoshi so cu tereno di pueblo pa beneficio di e grupo di corupcion rond di AVP cu nos tur sa ken nan ta. Pero september proximo den e Gobierno nobo di MEP nos lo debolbe nos digno pueblo tur e terenonan aki di pueblo bek na nos pueblo p’asina e necesidad/deseo y soño di tur famia pa ta doño di propio cas bira finalmente un realidad.

Nos lo ta trahando rib’e plan di solucion pa cas pa henter pueblo di Aruba pa den e proximo lunanan presenta esaki na Lider di Partido y Conseho di Partido pa e wordo incorpora den programa di partido concretamente”, sr. Croes ta declara.

Top