Glenbert Croes (MEP): Manera MEP a defende e pueblo di Cobalodo nos lo defende e pueblo di Tamarijn

“Loke ta pasando na Tamarijn ta un crimen contra henter Aruba cu Gabinete Mike Eman awor tin 8 aña ta cometiendo contra y den tur bario rond di Aruba. Wak kico ultimamente a pasa cu nos Franse Pas unda sin gevoel y consideracion Gobierno a duna DOW ordo pa kap e matanan den Franse Pas te na e extremo cu a destrui e monumento di nos naturalesa cu elimina e tunnel natural cu tabatin eynan”, según Glenbert Croes.

 

“Nos ta compromete nos mes cu nos digno pueblo cu na mesun manera cu MEP A DEFENDE E PUEBLO DI COBALODO, MEP LO DEFENDE E PUEBLO DI TAMARIJN.

Den e Gobierno proximo di MEP 22 di september en adelante, MEP lo prohibi tur e dump ilegalnan aki cu lamentablemente ta wordo crea den barionan cu aprobacion di e Ministernan di Gobierno di AVP.

Den e caso di Tamarijn tabata un sostenedor y sponsor di Minister Benny Zievinger y Gobierno di AVP cu a haya aprobacion pa crea e dump eynan cu consecuencianan grave pa henter e bario”, Glenbert Croes ta splica.

 

“Tres scol na Paradera a wordo perhudica dor cu e huma no ta laga Maestranan y Maestronan y nan studiante den un forma “safe” pa nan salud pa por sigui ta na e scolnan aki.

Mientras cu awor tin Colegio toets e cosnan aki ta tuma luga sin consideracion pa educacion y futuro di nos muchanan. E cosnan aki ta tumando luga cu aprobacion di Gobierno di AVP sin consideracion pa cu e biba di tur famia den nan hogar y den nan bario. E cosnan aki ta tuma luga cu tur e destruccion y daño cu e ta comete contra nos naturalesa”, el a continua bisando.

 

“Gabinete Mike Eman ta propaga e engaño di mas grandi di ta kere den “green”, no ta den e “green dollars” so nan a kere unda ta beneficio di un grupito so ta wordo privilegia manera den e caso di dump na Tamarijn unda hasta e doño a tribi di cuminsa cobra, mientras bao di capa di green AVP ta destruyendo e naturalesa di Aruba tur caminda.

MEP lo tene e doño y Gobernantenan personalmente responsabel pa e dañonan cu ta wordo cometi na e famianan den bario, na nan hogar, na scolnan y comercio y nan nos naturalesa cu tanto nos mester cuida y proteha.

 

E Gobierno nobo di MEP lo prohibi y elimina a actonan aki cu tanto a perhudica nos pais, nos pueblo y existencia y herencia di TUR e yiunan di nos pueblo pa lanta den un Aruba safe, limpi, sano y cu futuro”, Glenbert Croes a conclui.

Top