Glenbert Croes (MEP): Master yuda pasaheronan di Insel Air Aruba yega nan destino y mester apoya e trahadornan di Insel Air Aruba

Relaciona cu e situacion di Insel Air Aruba, lo tin un reunion di e comision permanente di Parlamento unda nos lo bay trata e desaroyo preocupante na Insel Air Aruba.

Di parti di MEP nos ta kere cu e meta di e discusion mester ta centra riba yuda nos pueblo pasahero di Insel Air Aruba yega su destino y alavez apoya e trahadornan di Insel Air Aruba dor di sigura continuidad den e operacionnan di Insel Air Aruba.

 

Nos tin confiansa den e departamento di aviacion civil di Aruba unda nos a mira nan tuma e decision dificil hasta di ground 5 di e avionnan di Insel Air Aruba.

Nos ta apoya nos departamento di aviacion civil pasobra di ningun forma por sacrifica e interes di siguridad den aviacion pa niun interes economico.

Siguridad den aviacion ta bay na prome luga semper pa siguridad di e personal di Insel Air Aruba, su pilootnan y e pueblo pasahero.

 

Insel Air Aruba a bin ta asumi e rol hunto cu e Insel Air di ta e aerolinea principal pa transporta nos hendenan entre Aruba, Corsou, Bonaire y St. Maarten.

Famianan na Aruba, Corsou, Bonaire, St. Maarten, Saba y St. Eustatius ta depende di Insel Air pa yega nan destino principalmente teniendo na cuenta tur e famianan cu ta biaha entre nos islanan y isla riba.

 

Nos kier sa kico Gobierno di Aruba ta haciendo. Nos tin e sentimiento cu Gobierno mes na nivel di conseho di Minister no ta haciendo nada nada nada pa yuda e trahadornan di Insel Air Aruba y nan no ta haciendo nada pa sigura continuidad den e servicio aereo pa tur pasahero yega nan destino.

Nos a tuma nota di tur retrasonan cu tin cu ta totalmente inhusto cu e pueblo pasahero.

Y situacion nan ey no por keda ripiti.

 

Pesey mi kier ripiti nos confiansa cu nos departamento di aviacion civil di Aruba lo haci nan trabao den sigura cu e metanan manera ariba resalta lo wordo cumpli cu ne.

Nos lo ta alerta y pendiente di e desaroyonan di Insel Air Aruba pa sigura cu den cualkier eventualidad e pasonan necesario lo wordo tuma pa sigura cu e operacion aereo pa Aruba Corsou, Bonaire y St. Maarten keda e conexion aereo semper.

Top