Glenbert Croes (MEP): MEP tin atencion p’e situacion reinante di Aruba Airlines y InselAir Aruba

Durante conferencia di prensa ayera di partido MEP, Glenbert Croes a duna di conoce cu el a tuma nota di e noticianan poco preocupante pa cu Aruba Airlines y cu InselAir Aruba. Tin poco desaroyo cu no ta nada positivo p’e companianan di aviacion di Aruba.

 

Glenbert Croes no kier comenta mucho riba loke ta pasando cu InselAir Aruba, pero a priminti cu e lo bin bek riba e caso di InselAir. Pero e kier p’e trahadornan di Aruba Airlines y tambe di InselAir Aruba sa cu MEP tin atencion pa nan situacion.

Glenbert Croes ta spera cu e problemanan cu tin na Aruba Airlines wordo coregi, pero asina mes e kier expresa un par di preocupacion cu nan tin.

 

E miembro di MEP kier manda un mensahe pa Departamento di Aviacion Civil di Aruba, den kendenan MEP tin pleno confianza, pero kier pa dicho departamento riba propio prerogative y propio responsabilidad, sin pidi Minister su aprobacion, pasobra e Minister actual di Transporte, Mike de Meza no tin atencion p’e problemanan cu tin den aviacion.

 

Ora un compania di aviacion ta pasando den problema financiero, seguridad den aviacion ta bira un discusion.

“Nos a tende poco dia ey, cu Aruba Airlines no por a bula riba Corsou, pasobra no a paga pa uso di espacio aereo. Ta tende con accionistanan di Aruba Airlines ta interferi, poniendo seguridad di e compania den discusion.

Pesey Glenbert Croes kier manda un mensahe pa tur accionista, cu no tin ningun accionista cu por pone pilotonan tuma un decision cu ta bay contra seguridad di e compania y su pasaheronan.

 

Tambe Glenbert Croes a bisa cu tin bon trahador cu kier sigui traha bon, pero nan ta wordo presiona y hasta menasa pa accionistanan pa haci cos contra ley. Pesey un apelacion na Departamento di Aviacion Civil pa tuma accion pa evita unda accionistanan ta interfeni den decision cu ta contra seguridad.

Y accionistanan ta menasando su trahadornan cu retiro, pa por trece nan hendenan for di Venezuela, loke no ta permisible.

 

Segun Glenbert Croes, e ta na altura di mucho mas cos, di loke ta pasando den Aruba Airlines y si nada ser haci pa Departamento di Aviacion Civil, e lo denuncia loke e sa publicamente. Gobierno actual ta defende e accionistanan, manera a sosode e.o. na casino, sin sali na defense di e trahadornan. Por ta e accionistanan di InselAir y di Aruba Airlines por tin un interes den Gobierno di AVP, pero MEP si no ta permiti esaki.

MEP no kier p’e dos companianan di aviacion bay malo, pero bao di ningun circumstancia por permiti pa perhudica seguridad di e trahadornan y menos ainda di e bon nomber di Aruba den aviacion.

Top