Glenbert Croes: Mester investiga gastonan adicional di hospital

Diamars mainta tabatin continuacion reunion di Parlamento unda cu e tema tabata e trabou adicional cu a wordo haci na hospital cu a costa 80 miyon florin adicional.

Glenbert Croes den su presentacion den Staten a bisa cu den e proximo 28 añanan Aruba mester bay paga e gastonan aki cu na final lo ta un poco mas di 860 miyon florin, compara cu e menos di 300 miyon florin cu e gastonan di ampliacion y renobacion di hospital a costa.

Nos ta kere cu proyectonan cu ta wordo haci cu placa di pueblo, esnan responsabel mester responsabilisa nan mes. No mester lubida cu e hospital ta di pueblo y mester percura cu e ta wordo haci di e miho forma. Pesey awor ta necesario pa haci un  evaluacion di loke ta wordo traha awo. Croes a bisa cu e hendenan cu conoce e material aki, esta di e sector di construccion, y cu a bishita e instituto ta cuestiona e calidad di e trabou cu ta wordo haci na e hospital. Scuchando esaki, Croes ta haya cu mester exigi miho calidad cu e trabou cheap cu tin awo.

El a recorda cu dia 20 di October a trata den reunion pa subi e acuerdo di lease sera cu SOGA cu 5 miyon florin pa por cubri e gastonan adicional door di e sala di operacion cu a bini aserca. E tempo ey, segun Glenbert, a trece dilanti cu ta bay bin un mayoria nobo cu lo anula e aprobacion di aumenta e lease cu 5 miyon florin. Esaki pasobra no a haya un splicacion pakico di e suma asina grandi di gasto adicional.

Pa MEP e mas di 80 miyon florin adicional no por wordo aproba sin tin un investigacion haci pakico di e suma aki, y con e proyecto ta wordo realisa, pasobra esun cu na final ta paga pa e cuenta halto aki ta pueblo di Aruba.

Photo credits: Marcel Rijsdijk

Leave a Reply

Top