Glenbert Croes: Na Aruba tin tur trahador cu e refineria mester y capaz pa haci tur trabao di rehabilitacion y operacion

Den un tono bastante firme, Parlamentario Glenbert Croes atrobe ta manda un mensahe cla na CITGO y Gobierno. Tur trahador local ta capaz y disponibel pa traha den e refineria inmediatamente.

Glenbert Croes ta bisa lo siguiente: “Nos kier na defensa di tur trahador local y contratistanan local manda un mensahe contundente pa Gabinete Mike Eman 2 y CITGO: Na Aruba tin tur trahador cu e refineria mester y capaz pa haci tur trabao di rehabilitacion y operacion di e refineria.

 

Hunto cu e felicitacion cu nos a manda pa tur contratista local cu a drenta e refineria y nan trahadornan, nos kier pa Gabinete Mike Eman 2 y CITGO sa cu nos ta debidamente na altura di e privilegio cu CITGO ta dunando un contratista particular cu ta diki-diki ligá na Gabinete Mike Eman.

No solamente CITGO ta previlegia e compania aki cu e cantidad di trahadornan cu ta drenta via e compania aki ligá na AVP traha pa CITGO, pero alabez nos fuente a confirma na nos cu e “rate” cu CITGO ta paga e compania encuestion aki ta hopi mas hopi cu loke cu CITGO ta paga tur otro contratistanan.

 

Nos kier pa CITGO sa cu unabez Gobierno nobo di MEP sinta despues di e victoria electoral di pueblo cu e victoria di MEP september proximo, nos lo elimina tur previlegio cu CITGO ta dunando e compania aki. Tur trahador local y tur contratista local mester  haya un oportunidad husto pa traha den e refineria.

 

Alabez nos a tuma nota di e noticia di tur trahador cu ta biniendo di afo. Nos a wordo informa tambe di un alianza scondi entre PDV, Casa y un Ministro di Aruba pa trece trahadornan di afor p’e proyecto di MANCAMP, mientras cu pa realisa e proyecto aki tin tur e experticio y mano de obra na Aruba mes.

Den un forma contundente nos kier notifica Gabinete Mike Eman y CITGO: Na Aruba tin tur trahador cu boso mester pa rehabilita e refineria. Traha riba e mancamp y tur otro proyecto por locual duna nan preferencia awor.

 

Alabez nos no mester niun compania di exterior pa certifica nos trahadornan. Tur e trahadornan local ta capaz y disponibel pa traha den e refineria inmediatamente.

Partido MEP ta exigi pa cuminsa contrata trahadornan local pasobra ora Gobierno nobo di MEP sinta e politica nobo lo ta preferencia total pa trahadornan local y contratistanan local pa tur trabao.

 

Unda no tin e specialidad na Aruba por trece e experticio aki di afo. CITGO recapacita awor y coregi su politicia corporativo, pasobra september lo tin un Gobierno di nobo di pueblo cu lo coregi e inhusticia aki”, Glenbert Croes a laga sa.

Top