Glenbert Croes: Nos ta balora CITGO pesey nos ta pidi nan balora nos trahadornan local y contratistanan local

MEP ta balora PDVSA/CITGO como socio estrategico di nos pais y e importancia di e refineria pa Aruba pa cual nos pueblo a lucha duro pa salba.

Den cuadro di e bon relacion y bon cooperacion cu nos kier mira entre Aruba y Venezuela den cuadro di e rescate di e refineria, Refineria di Aruba N.V. t’e brasa supervisor di e relacion cu CITGO p’asina sigura cu e aliansa aki tin beneficio berdadero pa Aruba y Venezuela.

 

Ta pasobra nos ta balora e aliansa cu PDVSA/CITGO, nos ta haci un apelacion sincero y legitimo na nan y na Refineria di Aruba N.V. p’e denuncianan cu nos a bin ta hayando riba e maltrato na nos trahador y contratistanan local.

Nos a ricibi denuncia contra companianan: PMEC, HAFRAN, PDV Mantenimiento y PDV Casa, y nos ta pidi e atencion di CITGO y RDA N.V. pa atende e denuncianan y tuma carta den e asunto aki p’asina impedi abuso y maltrato na nos trahadornan local y nos contratistanan local tuma lugar, según Glenbert Croes.

 

Ora trahador y contratistanan ta yega n’e representantenan di pueblo den e caso aki nos di MEP den Parlamento ta pasobra nan ta sinti cu Gobierno y e departamentonan concerni unda nan por acudi den situacion normal a bira lomba pa nan.

Di nos banda nos a bisa semper: MEP t’e partido di trahador, MEP ta un sindicato di pueblo y den cuadro di nos tareanan pa defende y protege nos pueblo di abuso y inhusticia di parti di e Gobierno di Anti Pueblo di AVP nos ta atende tur e denuncianan aki y nos ta pidi TUR concerni pa corigi nan accion y conductanan.

 

Nos ta duna tur e oportunidad pa recitifica e asuntonan aki, pasobra den e Gobierno nobo di MEP e situacionnan aki sigur lo no wordo tolera.

Nos di MEP, según Glenbert Croes cu a lucha pa rescata e refineria di Aruba pa felicidad y prosperidad di henter pueblo tin fe cu e Gobierno nobo di MEP lo tin un bon relacion atrabez di nos compania nacional di refineria RDA N.V. cu CITGO, cu nos lo tin un bon relacion cu Venezuela p’asina conhuntamente duna contenido husto n’e Win-Win/Ganar-Ganar cu e refineria di Aruba su reapertura mester representa pa nos ambos pueblo.

 

Lo unico cu nos ta exigi firmemente: Trata y paga nos trahadornan bon…trata y paga nos contratistanan local bon, di acuerdo cu Glenbert Croes.

 

Top