Gobernador Alfonso Boekhoudt a mustra con pueblo Arubano ta stima famia di Cas Real

“Awe nos t’ey hunto pa celebra e di 50 cumpleaños di nos Rey Willem-Alexander na Aruba, como parti di e Reino Hulandes.

Un cumpleaño ta para como símbolo pa recorda nos di e dia cu nos a nace y ta yuda nos refleha riba bida. E dia ey ta un dia cu nos tur, irespecto con diferente nos ta, ta haya cu mester wordo recorda.

Pero ora cu un persona ta cumpli 50 aña e tin un contenido special. Probablemente tur di boso cu  ta 50+ ta corda con boso a celebra e fecha memorabel aki”, asina Gobernador Alfonso Boekhoudt a cuminsa su prome discurso na ocasión di celebración di cumpleaños di Rey Willem Alexander.

 

“Loke ta haci di 50 cumpleaño special t’e hecho cu e ta un momento cu nos tin e tendencia pa para keto, y wak atrás n’e periodo cu a pasa y na mes momento reflexiona riba e periodo nos dilanti.

Den e caso di nos Rey Willem-Alexander, nos ta wak cu e.o. el a dicidi di permiti 150 otro cumpleañeronan di 50 aña celebra esaki hunto cu ne cu un comemento na Amsterdam. Pe ta importante tambe pa na un momento asina bo para keto pa aprecia loke bo tin: Bo estado di salud y bo sernan keri.

 

Na Aruba, nos tin un stimacion grandi pa Cas Real. Aruba a sa di demostra esey durante e bishita recien di nos Princes Beatrix. Coriendo den bus cu nos Princes mi a wak hendenan decora nan cas na oranjo, hisa bandera Hulandes, para basta largo warda e bus pasa pa nan por zwaai y saluda.

Nan a guia tanto muchanan como e grandinan bin pafo di nan cas, y hasta a saca esnan cu no por cana den rolstoel pa saluda nos Princes.

 

Pesey e ta na su lugar pa nos celebra e cumpleaños di nos Rey Willem-Alexander. E ta pas pa riba un dia manera awe nos brinda na su honor.

Pa nos refleha riba dje como nos Rey den forma special den nos pensamentonan y nos oracion. Awe nos atencion ta riba dje. Pero kisas hopi di nos lo tin gana di haya sa mas di ken ta nos Rey Willem-Alexander.

Historica y experto den nos Cas Real, sra. Dorine Hermans, a describi nos Rey di siguiente forma:

E ta describi’e como un hende cu ta relaha su mes door… di bula un avion, y bula bay den laira.

 

“Si mi tabata Alexander Jansen, lo mi a bira piloto”, el a bisa Renate Rubinstein, kende a pinta un cuadro di dje dia el a cumpli 18 aña.

Na 1992 Rey Willem-Alexander a alcansa e punto culminante di su carera como piloto na Kenia. Pa tres siman largo e mester a bula riba un grupo di 240 olifanti, menasa cu extincion, pa proteha nan contra di hendenan cu ta mata nan ilegal.

P’e por mantene su licencia di piloto e mester cumpli suficiente ora di buelo y pesey e ta un piloto sin salario di KLM.

Tambe e ta wordo describi como un hende cu ta scucha na…tur sorto di musica.

 

“Tanto musica clasico como moderno” el a bisa na 1993. “Musica clasico ta trece un trankilidad. Si mi kier sinta cu mi wowonan sera, mi ta pone musica clasico toca.”

Pero esnan cu a sigui su inauguracion ta corda con e DJ di musica “house” – Armin van Buuren –  a toca e musica aki pe.

Amantenan di TV ta corda bon con Willem-Alexander tabata bula hunto cu Armin na un concierto di “house” na New York na 2009.

Top