Gobernador Alfonso Boekhoudt: Cu fondonan aloca pa combati abuso di mucha, mester duna resultado

P’esnan mas vulnerabel den nos comunidad, Gobierno lo sigui pone atencion directo cu instrumentonan di maneho pa trece alivio y mehoracion riba termino cortico y cambio structural a largo plazo, según Gobernador Boekhoudt den su prome discurso di apertura di Aña Parlamentario.

Inversionnan den transferencianan social, den enseñansa y den condicionnan di biba, ta entre e accionnan concreto cu Gobierno a y lo sigui tuma.

E maneho integral di hubentud cu Gobierno ta hiba a percura pa un coordinacion continuo entre tur instancia cu ta trata cu derechonan di mucha y hubentud. Esaki a resulta den mihor bista riba bida y aspiracionnan di hobennan den nos comunidad y creacion di facilidadnan dor di Gobierno pa cumpli cu e necesidad di hobennan den areanan di enseñansa, economia, bida social, deporte y arte.

 

ABUSO DI MUCHA

Fondonan cu a aloca pa combati abuso di mucha a cuminsa duna resultado. Falta hopi pa haci pa eradica e abusonan aki. E prevension di abusonan aki ta keda e meta principal di e maneho.

Desaroyonan den nos region ta keda motibo pa Gobierno keda alerto pa garantisa seguridad den nos comunidad. E cooperacion entre entidadnan di seguridad local, como tambe di Reino, na nos fronteranan y riba tera, a resulta den mihor combatimento di criminalidad y peligernan externo.

E maneho riba tereno aki lo wordo intensifica pa por garantiza e seguridad cu nos pais ta spera.

 

Gobierno y Parlamento tin e tarea pa busca – bou tur circumstancia – e mihor solucion posibel pa tur reto di nos comunidad. E ta un tarea enorme y no tur ora facil. Pero e ta e tarea pa cua Boso a wordo eligi. Dos principio cu semper Boso mester considera ora di tuma desicion: Esta sirbi e interes general hunto cu e resultado di e balansa entre continuidad, renobacion y preservacion di recursonan escaso, entre desaroyo economico y mehoracion di calidad di bida den e forma mas amplio posible.

 

INTEGRIDAD

Den esaki integridad di servicio publico mester keda manteni y cu e meta aki Parlamento a tuma e iniciativa pa codifica e normanan di integridad di nos gobernantenan.

E principio di interes general ta rekeri pa scoge conciente y consistentemente pa loke ta bon pa henter nos comunidad enbes di loke ta cumbini algun a corto plazo of den futuro.

 

Según Gobernador e siguiente Gabinete lo tin e tarea pa continua cu realisacion di e 17 Metanan di Desaroyo Sostenible aki na Aruba y sigui traduci crecemento economico den bienestar pa tur esnan cu ta biba riba nos isla.

Como representante di Su Mahestad Rey Willem-Alexander y como cabez di Gobierno Boekhoudt a declara, manera Constitucion ta prescribi, e Aña Parlamentario 2017-2018 habri.

 

Cu den e Aña Parlamentario aki Dios Todopoderoso guia nos, fortalece nos y ilumina nos den nos pensamento y accionan pa nos por sigui ta ehempelnan pa nos comunidad pa nos sigui yuda nos isla crece y desaroya.

Leave a Reply

Top