Gobernador Boekhoudt den discurso di apertura di Aña Parlamentario: Aruba mester diversifica su economia mas ainda

Gobernador Alfonso Boekhoudt a admiti cu Gobierno a identifica industrianan creativo, logistica, tecnologianan limpi y exportacion di conocemento como 4 sector nobo, pa sigui promove crecemento economico unda tur hende por participa.

Negoshinan chikito, empresarionan independiente, empresarionan nobo, como tambe start-ups, ta esencial pa haci e diversificacion economico aki posibel.

Den e proceso aki lo haci uso activo di e caracteristicanan unico di nos isla, manera su acesibilidad aereo y maritimo, bon infrastructura, estado di derecho, proteccion di inversion, pa facilita y stimula e sectornan aki y contribui n’e diversificacion genuino di nos economia.

 

Pa logra e metanan di sostenebilidad cu Nacionan Uni a fiha, un fundeshi solido a wordo estableci:

Un infrastructura cu ta garantiza actividad economico y empleo riba termino largo, como tambe contribui directamente na un mihor calidad di biba y un bida mas sigur y saludabel. Esaki ta un infrastructura sostenibel. Entrega di e obranan mas importante cu nos a yega di conoce como tambe inversionan desplega den areanan publico, ta nifica aumento di productividad di infrastructura y mehoracion den e calidad di bida di nos hendenan. Esaki ta esencial pa un prosperidad duradero.

 

Digitalisacion y comunicacion electronico ta aceleradornan di economia. Un centro di ciudad vital ta un centro pa idea, comercio, cultura, ciencia, desaroyo social y hopi mas. Den e transicion pa un economia di experiencia ta di sumo importancia pa nos tin un sistema di pago moderno, un infrastructura di telecomunicacion cu por cargu’e y mas penetracion di digitalisacion den nos empresanan.

Den e mesun liña di e metanan di Nacionan Uni, como tambe un maneho di economia inclusivo, lo sigui fortalece e infrastructura di telecomunicacion como tambe fortifica posicion di consumidornan.

 

Nos a identifica 16 area rond di nos isla cu ta rico den biodiversidad, flora y fauna como areanan protehi. Tambe e proceso den implementacion di nos Parke Marino ta den pleno ehecucion.

Aruba a firma, den nomber di Reino Hulandes, e Acuerdo Climatico di Paris y ya caba a haci un peticion na Gobierno di Reino pa encamina e proceso p’e acuerdo aki tin valides p’e parti aki di Reino. Manera cu e metanan di desaroyo sostenible ta prescirbi, nos tambe a tuma accion urgente pa contribui na combati e impactonan di cambio climatico.

 

Den esaki Gobierno ta conciente cu maneho di naturalesa y medio ambiente t’esun di mas cardinal pa logra un desaroyo sostenible. Esaki, sinembargo, ta rekeri esfuerzonan combina entre Gobierno y sector priva pa por logra esaki.

Pa logra e metanan di sostenibilidad y pa traduci progreso economico den prosperidad cu tur hende ta parti di dje, ta sumamente necesario pa inverti den nos hendenan, Gobernador Boekhoudt a laga sa.

 

Den crea oportunidadnan nobo pa nan desaroyo personal y pa nan participacion den crecemento di nos pais. Esaki ta conta tanto pa hobennan cu ta preparando pa drenta mercado laboral y forma un famia, adultonan cu ta activo den economia y bida social, como pensionadonan cu ta conta riba e continuidad y stabilidad di e comunidad cu nan a yuda construi. Tur mester participa den e presente y e futuro di nos pais.

Pa tur grupo di nos comunidad, Gobierno a y lo sigui desaroya instrumentonan fiscal, facilidadnan fisico y legislacion adecuado pa sigui crea oportunidadnan nobo di desaroyo economico y personal, proteccion fisico y legal como ciudadano y consumidor, y condicionnan cu ta keda trece nos semper hunto como un comunidad.

Leave a Reply

Top