Gobierno di Aruba contento cu conclusionnan final di IMF su bishita na Aruba

Diabierna atardi Gobierno di Aruba a yama un conferencia di prensa cu presencia di Ministernan Eman, Bermudez y Arends. E tema principal di e conferencia tabata e conclusionnan final di IMF despues di nan bishita di trabou na Aruba.

 

Mike Eman den su introduccion a informa: “Laga nos cuminsa bisa cu nos ta sumamente contento cu e raport aki. Nos a yega di mira ‘statementnan’ diferente di IMF pa loke ta trata e retonan cu Aruba tabata confronta den añanan despues di e crisis, caminda nos tabatin un recesion economico grandi, nos tabata tin deficitnan grandi, nos tabatin preocupacionnan grandi. Y awe IMF den su ‘statement’ ta duna di conoce su punto di bista riba desaroyonan financiero, macro economico di Pais Aruba y tambe riba temanan di durabilidad. Cada un ta positivo pa Aruba!”

 

Prome Minister Mike Eman a mustra riba tres punto di importancia for di IMF su conclusionnan. E prome ta cu IMF ta remarca cu Aruba a sali for di un periodo di recesion economico di 2015 y 2016.

E instituto internacional ta premira un crecemento economico pa Aruba na 2017 y e añanan nos dilanti.

E di dos remarca importante di IMF tin di haci cu e reduccion substancial di deficit di Pais Aruba.

“Nan ta bisa cu, compara cu aña 2014, ta mira cu Gobierno a reduci e deficit substancialmente y awe hasta ta papia di un surplus di e siguiente dos añanan. Y esey ta algo cu, naturalmente, nos ta sumamente orguyoso di dje.”

E di tres punto cu IMF ta constata ta relaciona cu e efectonan negativo di fondonan di AOV, APFA y e seguro medico di AZV riba finanza di Pais Aruba.

 

Sr. Eman a splica cu ta, “algo cu durante e ultimo tempo nos a hinca hopi energia den dje. A cuminsa den e prome periodo di gobernacion cu ne y nos a sigui’e den e di dos periodo di gobernacion,” refieriendo n’e reformanan di AOV y APFA y tambe di AZV.

El a sigui splica cu cada un di e fondonan aki tabatin un drenahe substancial riba e finanza publico di Pais Aruba.

 

“Y dor di e reformanan cu nos a haci, nos a elimina e efectonan negativo cu e diferente fondonan di pensioen aki tabatin of por tabatin pa e finanza publico di Pais Aruba y tambe locual nos a haci cu AZV a reduci grandemente tambe e contribucion cu Gobierno mester duna como Landsbijdrage na AZV.”

 

Leave a Reply

Top