Gobierno di Canada ta adverti su cuidadanonan pa no biaha pa algun pais den Caribe: Aruba no ta inclui

Gobierno Canadiense a dicidi di emiti un advertencia na tur esnan cu kier bishita un isla den Caribe of hasta a ser haci mencion di algun pais manera Belize y Surinam.

Motibo di e advertencia aki ta, a constante actonan criminal, pa cual e turista Canadiense no ta sinti su mes sigur mas.

 

Den e 8 paisnan menciona, como sitionan peligroso, te ainda  nomber di Aruba no ta inclui y esey nos tur tin cu cuida.

E 8 paisnan ta: The Bahamas, debi na un cantidad di caso di atraco arma, unda e turista bira victima na e.o. Freeport y Nassau.

Gobierno Canadiense ta adverti su residentenan pa no cana na beachnan sin vigilancia, pa no cana nanso y menos ainda den scuridad, ya den scuridad ta unda tin hopi caso di abuso sexual ta tumando lugar.

 

BELIZE

Pa loke ta Belize, e conseho ta no bishita Belize debi na aumento di actonan criminal. Hopi t’e turista Canadiense cu ta bira victima di ladroncia cu arma, abuso sexual. Y esakinan ta sosode tambe den area di e hotelnan.

A adverti e turista Canadiense tambe, pa no bishita e frontera cu Guatemala, banda di e.o. Caracol.

Ta masha biahero femenino a bira victima di violacion sexual.

 

REPUBLICA DOMINICANA

Canada su Gobierno a adverti su biaheronan tambe pa no biaha na Santo Domingo, unda por a constata un aumento di actonan criminal. Tin un aumento di pick-pocketing y bag-snatching, cu ta tuma lugar na hotel, beachnan, aeropuerto, stacionnan di bus, robo di V-wagen y mas.

Mester tene cuidao cu e motociclistanan, unda e ladronnan ta usa pa horta nan victimanan, e.o. rancando nan pertenecianan y baha na awa.

E turista femenino ta ser adverti pa no subi den auto of bromer cu hende cu nan no conoce.

 

GUYANA

Gobierno di Canada no a spar Guyana, unda e rate di crimen ta masha halto mes. Tur clase di actividadnan criminal tin e.o. na Georgetown, incluyendo na Stabroek Market, Tiger Bay y na South Georgetown.

Pegasus Hotel te cu Sheriff Street mester ser evita di bishita, y igualmente mester evita di bishita pueblonan despues di bahada di solo, manera Buxton, Lusignan, Friendship, Annadale y New Amsterdam.

E biahero mester ta masha cauteloso tambe na Cheddi Jagan International Airport y riba Linden Highway, especialmente den oranan di anochi, ya cu varios atraco cu violencia a tuma lugar.

 

HAITI

Pa loke ta Haiti Gobierno di Canada a bisa cu no ta importante pa bishita e barionan manera di  Martissant, Carrefour, Bel Air y Cité Soleil, area di Port-au-Prince, unda no tin ningun clase di garantia pa cu seguridad pa ningun hende.

Actividad criminal ta masha halto na Haiti, incluso den centro di Port-au-Prince, unda tin masha hopi gang arma ta terorisa e capital.

Tabatin diferente reportahe di asesinato, secuestro, robo arma, joyriding, pues tur clase di actividad criminal, anto tur esaki durante dia cla.

 

JAMAICA

Jamaica no a keda afo. Canadiensenan ta ser conseha pa no biaha p’e areanan di Tivoli Gardens, Whitfield Town, Payne Land, West Kingston, Grant’s Pen, August Town, Denham Town, Hannah Town, Arnett Gardens, Olympic Gardens, Harbour View, Central Village, Spanish Town, Mountain View, Trench Town, Cassava Piece, Canterbury, Norwood y Rose Heights.

 

Tambe mester evita di bay e.o. Montego Bay, esta St. Clavers Avenue y Hart Street, Flankers, Canterbury, Norwood, Rose Heights y Mount Salem na Jamaica.

Ta recomendable pa no cana bo so ningun di e partinan menciona. Jamaica no ta sigur mas pa turistanan.

 

TRINIDAD & TOBAGO

Na Trinidad & Tobago, Canadiensenan ta ser avisa pa ta masha cauteloso, e.o. na Laventille y e sitionan popular pa turista manera Fort George, La Brea (Pitch Lake) y na Las Cuevas Beach, unda specialmente turistanan ta victima di e anti-socialnan, cu tin miras pa cu turista so.

Biaheronan di Canada ta ser avisa cu ora di biaha pa T&T pa evita areanan no mucho habita y cu ta scur e.o. banda di haf di Port of Spain.

 

SURINAME

Surinam ta un di e paisnan cu ta ser considera peligroso. Ciudadnan manera Albina y Moengo, y banda di East-West Highway entre Paramaribo y Albina.

Gobierno di Canada ta pidi pa evita tambe di bay n’e areanan di Palm Garden (“Palmentuin”) n’e area Hulandes na Paramaribo. Sigur despues di dia,  pasobra polis no por garantisa seguridad pa ningun hende. Unabes bira anochi, ta recomendable pa tur biahero keda den nan hotel.

 

Denuncia serio di Gobierno di Canada pa su residentenan cu kier bin den Caribe. Manera menciona caba, Aruba no ta menciona den e articulo aki, cu ta motibo cu nos mester sigui garantisa seguridad pa tur nos bishitantenan y tambe pa comunidad en general.

 

 

Leave a Reply

Top