Gobierno di Corsou kier move den ilegalidad hunto cu Avianca y Synergy Group

WILLEMSTAD — Manera ta conocí, te cu awe, e Gobièrnonan di turno for di tempo cu señor Earl Balborda tabata Minister enkargá cu Asunto di Aviacion, a nenga di honra e peticion di AVA pa otorg’é e asina yamá pèrmit económico, cu ta rekerí pa AVA por establecé su compania di aviacion na Còrsou.

Nos ley riba aviacion (‘Luchtvaartlandsverordening’) ta trece cu ta solamente despues di a adkerí e pèrmit aki, ta bira económicamente viabel pa AVA cuminsá haci su inversionnan cuantioso y forma su empresa p’e lo por haci su negoshi di aviacion, entre otro, dor di cuminsá tuma su personal di tera, tanto técnico como administrativo, y di buelo (pilotonan etc.) den servicio y pèrcurá p’e tin su avion y oficinanan nesesario.

 

Segun Presidente di AVA, Giovanni Atalita, na momento cu esaki keda finalisá, esta cu AVA tin su organisacion completamente na òrdo y AVA pasa tur e contròlnan di parti di Gobièrno, e ta bin na remarke p’e pèrmit final pa por cuminsá haci buelonan comercial cu pasahero y carga. Esta haci negoshi di aviacion.

 

E último pèrmit aki ta loke nos ta yama e ‘AOC’, esta e ‘Air Operater’s Certificate’. Te cu awe ta traba so Gobièrnonan a buta pa evitá cu AVA ta cuminsá bula cu su avionnan y duna pueblo un bon servicio di transporte aéreo.

 

Artíkulo 8 di nos Ley riba Aviacion ta prescribí cu transporte comercial di hende y carga cu avion den, via, pa òf for di Còrsou, por tuma lugar solamente dor di companianan di aviacion, na cua Gobernador y e Minister, encargá cu aviacion, pa medio di un decreto, a duna pèrmit pa buelonan regular respectivamente buelonan iregular (charter’).

 

Conforme e mesun artículo 8 aki Gobernador y e Minister en cuestion por duna e pèrmitnan aki solamente na companianan, cu ta incorporá y formá conforme leynan di Còrsou, cu tin tanto nan sede como nan punto principal di haci negoshi di aviacion na Còrsou, y di cua e parti mayor di nan capital ta den man di residentenan di Còrsou di nacionalidad Hulandes y di cua tanto e poder pa dicidí den nan maneho como e maneho aki mes ta establecé na Còrsou.

 

Similar na nos Ley di Aviacion e Protocòl multilateral riba liberalisacion di aviacion den Reino Hulandes, cu Còrsou, Aruba, Sint Maarten y Hulanda a firma cu otro na augùstùs 2011, ta permití solamente companianan di aviacion, cu ta establecé den teritorio di un di e paisnan aki y cu tin un AOC otorgá dor di un di esakinan y ta suheto na còntròl regulatorio efectivo dor di e autoridadnan aeronautico di un di e paisnan aki, y, p’asina leu cu ta trata Còrsou, directamente dor di propiedad di su capital òf un parti substancial di esaki, ta controlá dor di residentenan permanente di Còrsou di nacionalidad Hulandes.

 

Awor AVA ta comprondé cu Gobièrno di Còrsou tin pensá pa duna Avianca y su accionista Synergy Group còntròl di InselAir dor di laga Avianca tuma over e negoshi y/òf e accionnan den e capital di InselAir, incluso e rutanan y e AOC di InselAir y asina laga Avianca haci transporte comercial di hende y carga cu su avionnan den, via, pa y for di Còrsou.

 

AVA sinembargo no por aceptá e plan aki cu ta contra di tanto nos Ley di Aviacion como e protocòl menshoná. AVA, otro for di Avianca òf su accionista Synergy Group, ta cumpli cu tur e rekisitonan legal di tanto nos Ley di Aviacion como e protocòl aki.

Contrario na Avianca y su accionista Synergy Group, AVA si ta un compania, cu ta incorporá, formá y establecé conforme leynan di Còrsou, AVA si tin su sede principal y su punto principal di su negoshi di aviacion na Còrsou, AVA si ta un compania di cua e parti mayor di su capital ta den man di residentenan permanente di Còrsou di nacionalidad Hulandes y AVA si ta un compania di cua tanto e poder pa dicidí den su maneho como su maneho mes ta establecé na Còrsou.

 

Di otro banda ni Avianca ni su único accionista, esta Synergy Group, no ta un compania incorporá, formá y establecé conforme leynan di Còrsou. Tampoco Avianca y su accionista Synergy Group no tin nan sede principal ni nan punto principal di nan negoshi di aviacion na Còrsou, miéntras e parti mayor di nan capital no ta den man di residentenan permanente di Còrsou di nacionalidat Hulandes y tampoco ni e poder pa dicidí den maneho di Avianca y su accionista Synergy Group ni nan maneho mes no ta ubicá na Còrsou.

Na momento cu Avianca y/of Synergy Group tuma còntròl di InselAir, InselAir tampoco lo no ta cumpli ni cu nos Ley di Aviacion ni cu e protocòl entre e paisnan den Reino Hulandes.

 

Cu otro palabra si permití Avianca òf su accionista Synergy Group tuma over e negoshi di InselAir y su rutanan y su AOC, p’e haci transporte comercial di hende y carga cu nan avionnan den, pa y for di Còrsou òf cu avionnan cu ta haci escala na un punto na Còrsou, Gobièrno di Còrsou lo ta move den ilegalidad y AVA lo no aceptá esey.

Sigur no awor cu AVA ta cumpli cu tur cos cu nos Ley di Aviacion y e protocòl ta exigí p’e por operá su compania di aviacion na y for di Còrsou, pero ta neng’é esaki dor di neng’é su pèrmit pa faborecé compinchinan y doñonan di InselAir y Avianca, segun Giovanni Atalita, Presidente AVA Curaçao.

 

 

Top