Gobierno ta haci hopi pa mehora imagen di Aruba

Canando den e bario di San Fuego, aleha di e areanan di trafico a topa cu un cas cu a wordo converti den un negoshi di “Bed & Breakfast” p’esnan cu ta bin Aruba en busca di trankilidad.

E propietario ta Ingrid Renfrum, kende cu un sonrisa riba su cara a invita Prome Minister Eman drenta paden.

Esaki a tuma lugar diahuebs mainta durante Accion di Bario di Prome Minister Mike Eman pa invita habitantenan pa sendemento di luz den e bario di San Fuego.

 

E negoshi, segun sra. Renfrum a splica Prome Minister Eman, ta uno chikito unda cu su persona mes ta atende cu e clientenan.

“Mi a keda hopi contento cu bishita di Prome Minister Mike Eman y e noticia cu el a trece. Nos bario di San Fuego tabatin mester di un tiki atencion, principalmente e caminda cu mester wordo mehora.

Mi ta hopi contento cu Minister a tuma e tempo pa bishita ami y otro bisiñanan.”

 

E señora a bisa cu Aruba ta un isla chikito, pero cu ta creciendo hopi liher y birando ‘grandi’.

El a sigui bisa cu p’esaki “mi ta hopi contento cu tur e crecemento cu Aruba tin. Mi ta para 100% tras di e crecemento aki y nos tur como bario mester crece hunto cu nos Prome Minister y nos pais”.

E bishitantenan cu sra. Ingrid Renfrum ta ricibi ta bin for di tur rond mundo pa casi 4 aña caba.

E desaroyo cu Aruba a conoce a permiti’e pa crea e negoshi aki como un entrada pa su persona.

E ta contento di ta estableci den e bario di San Fuego cu tog ta basta trankil. Nan ta ideal situa, cerca di Parke Arikok pa cual el a splica Prome Minister cu ta masha importante p’e camindanan ta den bon estado.

 

E trabou di Gobierno of loke cu nan ta haciendo ta hopi dirigi pa hisa e imagen di e isla pa mundo pafo.

“Mi ta hopi gradici p’esaki. Tin biaha bo ta sali y mira cu tur caminda ta trahando riba caretera y tin hende ta consumi, pero na final e ta pa mehora e isla.”

Prome Minister Eman na final di e bishita cerca sra. Ingrid Renfrum a gradici’e p’e promocion cu e ta haci pa e isla.

E mandatario diahuebs mainta a cana riba henter e caya di San Fuego unda cu ta bay cuminsa instala luznan LED, sendiendo e prome diahuebs anochi.

E luznan lo yega te den e area dilanti Parke Arikok, unda cu Prome Minister Eman tabata di bishita tambe e mainta aki.

 

 

Top