Gobierno trahando cu autoridad local y di Reino pa brinda tur asistencia na St. Maarten

Cu e proposito di comunica na famia y amigonan di Arubiano na St. Maarten, Prome Minister Mike Eman a bay radio dialuna merdia pa informa di e prome dos buelonan comercial cu a logra canalisa pa bin Aruba for di e isla seriamente afecta pa horcan Irma.

E buelonan ta resultado di e esfuerzonan cu Gabinete Mike Eman II a bin ta haci for di prome cu St. Maarten a keda impacta p’e fenomeno natural.

Nan ta inclui coordinacion cu diferente instancia y autoridad local, ademas di Reino pa dirigi e recursonan humano y material, di e mihor forma posibel pa nos rumannan na St. Maarten.

 

Prome Minister Mike Eman personalmente a reuni for di inicio di siman pasa cu directiva di entre otro: Rampenbureau, Cuerpo di Polis, Cuerpo di Bombero, Departamento di Trabou Publico (DOW), Cruz Cora y tambe Departamento di Salud Publico.

Un di e prome decisionnan y stap cu a tuma tabata e tramitacion via Ministerio di Defensa di Hulanda, pa personal di Arumil por uni n’e soldatnan di Marina Hulandes cu a biaha pa isla pa haci rescate y duna prome asistencia.

 

“Nos Arumil ta completamente incorpora, pa cual nos ta sumamente gradici cu nan sinti di solidaridad asina halto pa yuda nos isla ruman den e sitacion dificil aki,” asina Premier Eman a expresa durante su entrevista en bibo na radio.

E atencion cu Gobierno di Aruba a duna e desgracia na St. Maarten tabata diario evaluando e dañonan atrabes di e canalnan oficial y asina preparando na Aruba n’e manera cu lo ta mas util. N’e momentonan aki tin na Aruba ekiponan di infrastructura y salud publico, entre otro, cla pa sali, n’e momento mas indica.

Leave a Reply

Top