Gran apertura di Little League Aruba Subway Series

 

Diabierna anochi​​​​​​​​​​​​​​​​​​​​​​​​​​ den un Joe Laveist Ballpark yen di fanatico di baseball a duna inicio na e temporada di baseball cu e campeonato di Aruba Little League 2017.

E deporte di baseball na Aruba e ultimo añanan a crece grandimente danki na e popularidad di Xander Bogaerts cu e ekipo Boston Red Sox. Un total di mas di 1200 mucha di e liganan di North, Center y South a uni p’asina tur e ekipo di Aruba participa na e desfile inaugural.

E damanan di softball Little League a habri e desfile diabierna anochi, sigui pa esnan di mas chikito di edad di 5-6 aña te na esnan mas grandi di 17-18 aña cu a desfila pa e publico grandi na Joe Laveist Ballpark.

 

Aruba Little League ta un organisacion cu ta depende riba boluntarionan cu ta duna di nan tempo pa por dedica na siña e muchanan e deporte di baseball. Y comercio en grande ta apoya e programa di Little League dor di sponsor varios ekipo di Little League, pero un sponsor grandi e aña aki ta Subway Aruba. Nan a haci desvelo di e logo cu ta hiba e nomber di Little League Aruba Subway Series unda cu Subway a sponsor mas di 200 caha di bala p’asina por organisa e campeonato di Little League y e cuerpo di umpire tambe lo ricibi nan uniform nobo for di Subway.

Aruba South Little League a organisa e anochi ameno di apertura y asina e president di liga sr. Serio Romney a bay over na entrega un plakaat di reconocemento na umpire sr. Esmond Jones pa su añanan di dedicacion na South League. Despues sr. Donny Kelly a sorprende sr. Serio Romney cu un grato sorpresa y anuncia cu e campeonato 2017 di South Little League lo ser dedica na sr. Serio Romney.

Despues sr. Serio Romney a duna danki na un sponsor di mas di 30 aña pa Aruba South Little League di Kiwanis Aruba. Representante sra. Aurora Dijkhoff a hiba palabra na nomber di Kiwanis unda nan a presenta un check como donacion na e liga.

 

Finalmente, District Administrator di Aruba Little League sr. Rhudy Donata a presenta e sponsor oficial di Aruba Little League cu e aña aki lo carga e campeonato Little League Subway Series Aruba. Representante di Subway Aruba sr. Tai-Foo Lee a haci entrega simbolico di un caha di baseball na DA sr. Donata demonstrando asina nan compromiso grandi cu nan tin cu e deporte di Little League como main sponsor.

 

Na ultimo a hiba palabra sr. Ebby Schwengle cu a representa Minister di Deporte unda el a duna palabra di elogio na tur e boluntarionan y mayornan cu ta haci e esfuerso pa educa nan yiunan den e deporte di baseball.

E hoben Jayden Jansen di e organisacion di Hurricanes a lesa e credo di Little League, mientras cu Jeanine Roga a lesa e credo di mayornan y e crew di umpire a lesa e credo di umpire pa recorda cada un e importancia di e programa di Little League.

Sr. Ebby Schwengle tabatin e honor di tira e “first pitch” mientras cu sra. Aurora Dijkhoff a fungi como e bateador y asina a duna inicio oficial na e campeonato di Aruba Little League 2017.

Nos di Sports Zone Aruba kier a gradici tur esnan cu ta haci e programa aki uno exitoso, na comercio di Aruba cu ta sostene nos hobennan den e deporte di baseball dor di sponser e ekiponan di Little League. Na e boluntarionan cu ta haci e trabou di Coach, Manager, Umpire y Scorer tur ta boluntario cu ta duna nan tempo liber pa dedica na nos hobennan.

Y por ultimo cu e temporada nobo ta yena cu alegria di victoria y momentonan pa siña ora di derota y cu mayornan sa di apoya nan yiunan sin importa e resultado. Ta momentonan di hermandad cu lo dura pa semper.

 

Pa informacion di deporte local sigui nos riba nos rednan social via Sports Zone Aruba of bishita nos website www.sportszonearuba.com.

Top