“Grandesa di nos Pueblo…!”

 

Grandesa di nos pueblo, nos ta mir’e den nos mes ora nos sa ta ken nos ta,

nos ta disfrut’e ora nos ta conoce nos libertad y reconoce nos responsabilidad.

Grandesa di nos pueblo ta tur loke tur dia, Aruba ta brinda nos y ta pone den nos man,

cu sigur niun otro tera, por ofrece nos asina tanto calor, amor y bondad.

 

Grandesa nos ta descubri’e den nos cultura cu ta e spiel y refleho di nos identidad,

den nos cunukeronan y nan humildad, den nos piscadonan balente luchando contra lama.

Den nos artistanan creativo y talentoso demostrando e amor pa nos libertad,

den e pinturanan di nos indjannan den cua nos por destaca nos creatividad.

 

Grandesa di nos pueblo, nos por mir’e den nos naturalesa asina rico y diversifica,

den nos cuebanan y playanan cu local y bishitantenan ta keda encanta.

Den e caranan di nos muchanan y hobennan na unda nos por mira pinta Aruba su mañan,

den e sabiduria di nos grandinan na unda nos herencia lo ta keda sigura.

 

Grandesa nos por scuch’e den nos idioma Papiamento den cua nos ta comunica,

den e palabranan profundo y sincero cu nos por haya di un bon ruman.

Den e trato cu nos ta brinda na nos bishitantenan, famianan y amigonan,

ofreciendo cada dia nos alegria, nos generosidad y sinceridad.

 

Grandesa di nos pueblo nos por hay’e ora nos ta biba den paz, harmonia y trankilidad,

den e virtud, enseñansa y sabiduria di nos grandinan, cu nos mester sigui practica.

Grandesa no ta den tamaño di nos isla, sino den detayenan simpel cu balor sentimental,

manera nos cultura, nos folklore y tradicion na unda nos por descubri tur nos identidad.

 

Grandesa di nos pueblo nos ta hay’e ora nos ta siña lucha, bataya y sacrifica,

pa nos por haya cada dia ariba mesa, e pan y alimento bendiciona.

Ora nos ta pone curason na tur loke nos ta propone pa alcansa,

ora cu nos ta sinti nos mes feliz di biba ariba un tera asina bendiciona.

 

Grandesa di nos pueblo ta ser refleha den nos caracter generoso y nos humildad,

ora nos ta consciente y ta reconoce cu e futuro di Aruba ta den nos propio man.

Grandesa di nos pueblo ta ora nos paisahe, patrimonio y herencia ta lagabo inspira,

manera ora nos ta mira nos bandera den cielo ta balia cu biento un dushi wals.

 

Grandesa di nos pueblo ta ora nos ta brinda nos isla nos atencion y fidelidad,

ora nos ta expresa cu nos echonan, cu nos ta stima Aruba di berdad.

Grandesa ta florece ora nos ta conoce tolerancia y ta capaz di comparti cu igualdad,

ora nos ta sembra den nos tera, cultiva y cosecha pa e dia di mañan lo ta uno sigura.

 

Grandesa di nos pueblo, nos por contempl’e den e paisahe Caribense y tropical,

den e bukinan di nos historia na unda nos logronan ta bon documenta.

Den nos naturalesa cu ta resalta pa su brisa refrescante, nos clima y nos lama,

den e color di nos cuero na unda nos por mira e solo ta pinta.

 

 

Grandesa di nos pueblo ta nos pais, nos rais, nos cultura, nos folklore y nos identidad,

cu ta haci nos orguyoso y satisfecho di tur loke nos ta.

Ta nos hendenan, nos solo cayente, nos color di cuero, nos rasa di indjan,

cu ta brinda nos mas di un motibo pa nos ta mas cu namora.

 

Grandesa di nos pueblo ta nos simpatia, nos cortesia, nos amabilidad y nos cordialidad,

cu t’e prendanan mas valioso riba nos cara refleha,

Ta nos poesianan, nos storianan, nos cuentanan y nos leyendanan,

cu ta conta e grandesa di nos pueblo y ta resalta nos identidad y libertad.

 

Grandesa di nos pueblo ta nos bida, nos famia, nos historia y nos simbolonan nacional,

cu ta yena nos cu emocion y ta brinda nos tur felicidad.

Ta e amor pa nos patria, nos caracter humilde, cordial y servicial,

cu ta e rikesanan di mas grandi cu nos mes a hereda…!

 

Competencia Literario: “Poeta di Patria…!  Aruba, 13 di maart 2017.

Titulo: “Grandesa di nos Pueblo…!” Autor: Jhon Freddy T. Montoya.

 

 

Top