Grasshopper a bira e di cuater organisacion deportivo cu ta haya batting cage cu ayudo di Gobierno y Lotto pa Deporte

 

E organisacion deportivo Grasshopper di Ayo ta super contento na momento cu siman pasa a keda inaugura oficialmente e batting cage. Nan ta bira e di cuater organisacion deportivo cu ta haya batting cage cu ta yuda miembronan desaroya nan mes mas miho den e deporte di baseball.

 

Presidente di e organisacion Antoin Kelly a expresa su alegria grandi durante e ceremonia cu a tuma luga den presencia di Prome Minister Mike Eman, su team y tambe miembro y nan mayornan.

“Nos a haya un joya. E ta algo pa nos muchanan y hubentud. E ta un instrumento pa nos traha cu nos hobennan y nan desaroya nan mes. Nos ta masha agradecido na Gobierno di Aruba, Prome Minister Mike Eman, Minister di Deporte Alex Schwengle, Lotto pa Deporte, tur e sponsernan cu a yuda nos”, Kelly hopi emociona a expresa.

 

Prome Minister Eman di su banda tambe tabata sinti un alegria grandi pasobra e ta haci entrega di un batting cage cu ta stimula e hobennan pa nan bira miho den e deporte cu nan ta practica. “Un momento asina di ampliacion di e facilidad deportivo ta un estimulo pa nan tur.

Pero tambe pa e mayornan y e organisacion Grasshopper cu ta uno hopi activo.

 

E mandatario a probecha pa anuncia cu semper na momento di inaugura un batting cage ta dedica esaki na un personahe den mundo deportivo.

Den e caso di esun na veld di Grasshopper, e mandatario a bisa cu a dedica esaki na un persona cu el a siña conoce di cerca ultimo añanan durante e bishitanan cu a haci tanto na e veld di Ayo como na e Centro di Bario.

Un persona hopi dedica na deporte, specialmente Grasshopper pa cual el a pidi un standing ovation pa e persona aki: Antoin Kelly. Como aprecio a haci entrega di un bat special, cu un dedicacion di Prome Minister Mike Eman expresando su admiracion pa e trabou di boluntario cu e cabayero aki ta haci pa deporte.

 

Na final e mandatario a manda e siguiente mensahe: “Hopi bendicion pa boso tur y cu nos Creador sigui guia y inspira Antoin y tur e otro coachnan cu ta dedica asina hopi tempo na deporte y na nos hobennan.”

Prome Minister Mike Eman y su team ultimo añanan a bishita diferente veld deportivo, scuchando cual ta e necesidadnan, ya cu deporte ta un instrumento importante pa formacion di mucha y hobennan pa bira lidernan di mañan.

 

Un soño di e mandatario ta pa e veldnan unda cu hopi hoben ta practica baseball por haya batting cage y pitching mashin pa yuda e hobennan desaroya nan mes mas miho y yega leu den e deporte di baseball, manera cu Xander Bogaerts ta logrando. Grasshopper ta e di cuatro organisacion cu a haya un batting cage.

Top