Green corridor tabatin un retrazo di 4 luna

Debi na falta di material disponibel riba e isla

 

Den e conferencia di prensa teni recientemente door di DOW unda cu a elabora riba diferente aspecto di Green Corridor, tabata presente Alex Amalvi, kende ta gerente di e proyecto di Green Corridor pa e compania Caribbean Infrastructure Company (CIC), como tambe parti di e ekipo di ODINSA.

Den su discurso el a enfatisa cu nan no por tuma responsabilidad indefini den e proyecto di Green Corridor y cu lo haci e mantencion y reparacion den cuadro di loke e maneho cu ta wordo hiba door di DOW y su plannan. Loke nan ta responsabel p’e ta bon defini den e contracto cu a wordo hinca den otro door di expertonan di diferente sector cu tin di haber cu e proyecto.

Como cu ainda ta den etapa di construccion, nan ta casi cla, pais Aruba ainda no mester a cuminsa paga. Na momento cu e proyecto ta finalisa, e compania CIC ta keda encarga pa e aspecto di mantenimento. Nan mester percura pa e caminda ta keda funcionabel y accesibel pa e pueblo di Aruba.

Prome cu e proyecto wordo entrega, e mester wordo evalua y mester tin su certificado di disponibilidad, basa riba tur e hechonan cu e ta cumpli cu tur loke ta para den e contracto firma. Nan ta den e fase aki hunto cu DIP, DOW y CIC. Na e parti unda cu no por a construi exactamente manera a wordo bisa, mester yega na un acuerdo pa recompensa e situacion. Hecho ta cu nan ta spera cu e certificado di disponibilidad ta cla pa e prome trimester di 2018. Inicialmente a spera di por a keda cla na augustus 2017, pero tabatin negociacion largo na cierto punto di e proyecto pa cumpli cu e vision cu e proyecto ta beneficia e comunidad, pero tambe cu e ta factibel pa un compania priva participa den esaki. El a tuma un poco tempo y tampoco tabata facil pa dispone di material, proveedor y makinario na Aruba cual a haci cu a tuma mas tempo cu normal, y a trece cune un retrazo di 4 luna. Pero hecho ta cu e caminda principal ta cla y den uzo.

 

 

 

Leave a Reply

Top