Grupo 10 y 11 di SVT Formacion Social ta duna un man na Kerki Protestant Piedra Plat

Diaranzon mainta un grupo di mas cu 20 hoben pertenece n’e gruponan 10 y 11 di SVT Formacion Social a yuda haci limpi na Kerki Protestant na Piedra Plat.

E hobennan a atende e yamada haci p’e directiva y ta haci e accion comunitario cu smaak como parti di nan enseñansa cu ta relata na trabou boluntario.

 

Director di Oficina di SVT Formacion Social, Jessy Ras a duna di conoce cu e mucha hombernan tabata masha balente y ta disfruta di por yuda otronan.

Durante ultimo 4 aña Formacion Social ta incorpora e aspecto comunitario den nan trayecto di 12 luna cu ta consisti di, entre otro, entrenamento militar, guia spiritual, capacitacion pa trabou y practica.

Organisacionnan cu ta haya asistencia di hobennan di Formacion Social regularmente ta ‘Aruba Doet’ y tambe ‘Rotaract Aruba’ pa Fiesta Rotaria.

 

Jessy Ras a splica cu e peticionnan ta yega sea directamente na oficina di ‘SVT Formacion Social’ of ta bin pa medio di otro departamentonan di Gobierno di Aruba. Cada un ta wordo evalua teniendo cuenta cu e schedule cu ya caba e hobennan tin, pero semper cu ta posibel, ta gusta duna un man.

Prome Minister Mike Eman semper ta contento di tende cu e hobennan di SVT ta contribui n’e bienestar di nos comunidad y ta hayando e experiencia bunita di trabou boluntario.

 

Den e caso di Kerki Protestant Piedra Plat, e bunita cura patras di e edificio principal lo sirbi como lugar di encuentro y recreacion pa grandi y chikito durante un ‘Dia di Famia’ diahuebs otro siman 25 di mei.

Hobennan di SVT a chapi bou di pal’i kwihi, rond di piedra y a benta e sushinan afo lagando e lugar bunita y cla pa ricibi publico.

 

 

Top