Grupo 11 di Formacion Social a drenta Mariniers Kazerne

Dialuna mainta tempran, hobennan cu a inscribi nan mes pa haya un chens di forma parti di Sociale Vormingsplicht (SVT) of Formacion Social, a presenta na porta di Mariniers Kazerne na Savaneta.

E 15 hobennan a pasa den un trayecto di seleccion riguroso y a pasa testnan necesario prome cu a yega asina leu.

Nan grupo t’e di 11 grupo di e programa cu a cuminsa 5 aña pasa como un cooperacion entre Ministerio di Asunto General y Ministerio di Defensa di Reino Hulandes.

 

E motor tras di e programa aki tabata Prome Minister Mike Eman cu semper a considera e programa aki uno importante y tambe cu a demostra su efectividad, yudando hobennan cu no a logra finalisa scol, un mihor perspectiva pa nan futuro.

Grupo 11 a wordo ricibi p’e team di maneho di Formacion Social encabesa pa Lurene Flanegien, kende ta sostene programa di Formacion Social como un trahador social.

E hobennan na nan yegada a haya splicacion extenso di tur e responsabilidadnan cu nan tin nan dilanti.

 

Un parti importante di e programa ta cu un bes e hobennan drenta Marinies Kazerne, nan lo no tin contacto cu ningun famia y amistad pa 3 siman largo. Esaki t’e fase inicial di e trayecto y ta esun mas intensivo di e henter e programa.

Meta primordial di e proyecto ta pa yuda hobennan cu no ta bayendo scol y cu no ta traha pa haya un formacion p’asina nan por logra mehora nan perspectiva pa futuro y evita cu nan por bay den direccion robes.

 

E formacion ta consisti di 4 luna di preparacion den Mariniers Kazerne bou guia di un team dedica di ARUMIL. Aki nan ta sera conoci cu tur faceta di disciplina manera lanta tempran, yega na ora, determinacion, ehercicio fisico y traha den team.

E otro 8 lunanan ta dedica na atende diferente curso di Enseñansa pa Empleo y un parti practico, stage, na un empresa.

Dialuna mainta ta un dia trankil p’e participantenan, segun sra. Flanegien. E ta un dia pa nan sera conoci cu otro, pas nan uniform y ricibi tur e materialnan cu nan ta bay uza den e simannan nan dilanti.

Top