Grupo grandi di persona indigna y desapunta

Skirbi pa: Rory Arends
Diabierna 21 di april na e popular y tradicional acontecimento di “Happy Hour” na Djiespie’s Place den Caya Betico Croes, hopi hende a keda indigna y sorpresa pa un anuncio di sr. Etty Toppenberg na fin di anochi cu diabierna awor, dia 28, e acontecimento aki lo no sigui pasobra tal y tal banda musical lo ta tocando rib’e plaza ey.
Tabatin hopi comentario entre e presentenan, hopi di nan hende nan grandi conoci den nos comunidad: pensionado di Gobierno, dokter, abogado, educador, etc.

Hendenan cu ya pa mas di un aña tur siman ta anhela pa diabierna yega pa nan bay pasa un bon rato na Djiepie’s, scuchando y bailando musica di nan gusto, y combersando agradablemente.
Te asina leu, e rasonnan pakico a yega di cancela e acontecimento aki ta pa motibo di luto, malesa, viahe y dianan sagrado manera Bierna Santo.
Averiguando mas leu, nos a bin haya sa cu diabierna awor tin un evento programa na Plaza Niki Habibe, como parti di e conferencia di turismo CATA. Esaki no ta un motibo valido.

Tin Plaza Daniel Leo, tin Plaza Padú Lampe, tin Plaza Turismo. Te hasta por a pensa na hiba e evento pa Carnival Village na San Nicolas. Ta cu bus ta transporta e participantenan toch.
Pakico kibra un tradicion cu pa mas di un aña ta wordo organisa practicamente TUR diabierna y cu ta un evento popular cu hopi bon acogida.
Si ta cueste loke cueste kier a haya e agentenan latino di CATA na Plaza Niki Habibe, anto por a invita nan pa bin pasa un rato agradabel cu pueblo di Aruba na Djiespie’s Place pa nan sinti e sabor local y cu bon musica di un grupo di musico local boluntario. Tin suficiente luga y Djiespie’s por a haya algo extra e anochi ey.
Kibrando un tradicion popular di mas di un aña, ta cierto falta di respet pa un evento di pueblo cu ta wordo atendi pa habitantenan di tur distrito di Aruba. Na Hulandes nan ta bisa “gewoonte maakt wet” y esey bal su respet.
Nos tin entendi cu e organisadornan ta ATA y AHATA, ambos organisacion cu pa casualidad un tempo mi a dirigi. Mi ta spera cu ainda nan por recapacita y laga pueblo cu su evento y sea uni e agentenan latino cu pueblo, of move nan evento pa otro localidad.

Top