Grupo Nucleo y cu e Intercambio Cultural entre-Generacion

Pa hopi tempo tin organisacionnan social pa nos grandinan cu a sigui ta activo den diferente districto di Aruba.

Por ehempel un di nan t’e organisacion Senioren ‘Golden Agers’, cua ta hunto cu YMCA, San Nicolaas, ta celebra den 2017 nan 75 aniversario.

Asina tin otronan cu tin ya 30 y 35 aña ocupa rib’e tereno aki den districto di Paradera, Noord y Oranjestad.

 

Nos ta aprecia iniciativanan manera menciona ariba, cu nan participacion social di nos grandinan y por lo tanto ta promove elementonan social. For di cual por sali proyectonan manera nos grandinan boluntario cu ta guia otro gruponan di nos grandi y hobennan, hobennan cu ta yuda nos grandinan, cu cursonan dirigi riba necesidad y deseonan di nos grandinan riba diferente tereno, etc.

 

‘Grupo Nucleo 60+’ a keda lanta na 2013 y ta consisti di miembronan di organisacionnan social di nos grandinan.

Den total nan ta 26 organisacion social di nos grandinan.

Meta di ‘Grupo Nucleo 60+’ ta pa medio di strategianan di empodera, promocion di e desaroyo y bienestar di grandinan en general y e compromiso social y participacion di nos organisacionnan local di nos grandinan, en particular.

Un punto di salida importante den esaki t’e ‘Organisacion Mundial di Salud’ t’e comprension di ‘bira grandi (bieu) activamente’.

 

Akinan ta para central e optimalisacion di e capacidad di desaroyo sigur p’e gruponan organisa di nos grandinan den diferente districtonan di Aruba, via promocion di e forsa di ciudadanonan y e traspaso di conocemento pa promove un imagen positivo di nos grandinan.

 

Cu e iniciativanan ya menciona nos ta purba di logra nos siguiente metanan;

 

  1. Formacion di e coalicion y logra trabou den conhunto den e gruponan di nos grandinan existente y instancianan relevante, tanto riba nivel di districto como nivel nacional.
  2. Promove e participacion di comunidad y e participacion di e personnan di mayor edad
  3. Manteniendo e balornan cultural y tradicional.
  4. Promove un estilo di bida saludabel atrabes di e participacion y actividadnan fisica y socialisacion.
  5. Promove e contacto y transferencia di conocimento entre generacionnan hoben y nos grandinan.
  6. Reuni varios gruponan di personanan di edad grandi pa socialisa y pa e placer y e convivencia.
  7. Fortalecimento di e organisacionnan relevante atrabes di recaudacion di fondonan pa e realisacion di su actividad y proyectonan.

 

Diamars venidero, 17 di october, lo bay tin na Cas di Cultura pa di dos biaha un evento cultural titula ‘Encuentro cultural entre-generacion’ na unda nos grandi y hobennan lo topa otro riba scenario pa un presentacion.

E iniciativa aki tin como obhetivo proporciona of duna e contacto y interaccion entre gruponan di hende di diferente edad, riba un nivel social cultural (musica, teatro, baile, poesia).

 

Algun di e gruponan cu lo haci presentacion ta:

Grupo Palisia, Danza Aruba, Tai Chi, Vio Wester y su grupo, Flor di Brazil, Titi Tromp y ‘Nos cu Nos’, Mariachi ‘Luz de Luna’, Betty Werleman, Edwin Kock, Famia Rincones, Grupo Savaneta

 

Asina ta, no perde e evento aki cu ta ‘Intercambio Cultural entre-Generacion’ riba diamars 17 di october venidero, pa 7’or pm den Cas di Cultura.

Entrada ta 5 florin pa persona.

Por yama na 565-1145 of 567-6700 y tambe si resta, por cumpra entrada na porta di Cas di Cultura.

 

Bin apoya e iniciativa aki caminda cu dos generacion ta uni pa presenta un bunita show.

 

Leave a Reply

Top