Guardacosta ta simbolo di e bon cooperacion entre Aruba y Hulanda

DEN HAAG – Guardacosta di Reino ta simbolisa e bon cooperacion entre Aruba y Hulanda. Esaki tabata e esencia di un encuentro entre Minister Plenipotenciario Juan David Yrausquin y Minister di Defensa Jeanine Hennis-Plasschaert.

 

Durante di e bishita di cortesia cu a tuma luga na e Ministerio di Defensa a papia den un ambiente hopi ameno y contructivo rib’e contribucion positivo di Guardacosta e. o. riba combatimento di traficacion di droga via Aruba, fluho di ilegalnan pa Aruba, control maritimo riba medio ambiente y pesca.

 

Na 2015, Guardacosta di Reino a intercepta en total 12 transporte di droga y a confisca mas cu 8782 kilo di droga. Asina por lesa den e relato anual di Guardacosta pa 2015.

Segun e relato anual na 2015 a gara 88 persona cu tabata ilegal. E cantidad di ilegal ultimo añanan a mustra un situacion variante.

Na 2015, e cifranan di Guardacosta ta menciona un aumento di ilegalnan for di Venezuela pa Aruba. E relato anual di 2015 ta bisa cu Guardacosta ta conta cu 242 formacion, incluso e funcion di director di Guardacosta.

Na december 2015, e grado di ocupacion di personal tabata 87,5 porciento.

 

E gastonan di e Guardacosta, cu ta consisti principalmente dor di gastonan di personal, material y exploracionnan aereo, ta aumenta na un suma total di mas cu 36 miyon euro.

Guardacosta di Reino ta un responsibilidad di tur pais den Reino Hulandes. E presupuesto di e Guardacosta ta wordi financia pa medio di un yabi di distribucion cu a keda stipula pa e ministerio di Asuntonan di Reino (BZK). Den e sistema aki Hulanda ta tuma 69 porciento pa su cuenta y Aruba su parti den esaki ta 11 porciento.

 

E Guardacosta di Reino tabata un initiativa di Aruba. Bou di Gabinete Eman II, Prome Minister Henny Eman a boga na Hulanda pa bin cu un Wardacosta pa controlo e costa y awanan di Aruba. Esaki principalmente pasobra Aruba e tempo ey, tabata wordo uza como trampolin entre e paisnan productor di droga y e paisnan consumido di droga.

Top