Guardian Group Sprint Triathlon lo ta diadomingo awor na Boca Catalina

Despues di a organisa e Kids Aquathlon, Federacion di Triatlon Arubano, ATA lo organisa un otro tremendo evento pa nan tri-atletanan e biaha aki e tan gusta Guardian Group Sprint Triathlon, esaki diadomingo 15 di october proximo.

E evento di Sprint Triathlon lo ta programa pa cuminsa pa 7’or di mainta y lo ta n’e lugar di custumber, esta Boca Catalina na Malmok.

 

E evento di Sprint Triathlon lo ta uno veloz mirando e distancianan cortico cu tin cu wordo recori, pero mas cu claro e intensidad lo ta uno halto. Pa loke t’e participacion pa cu e careda di Sprint Triathlon, e categorianan lo ta den Super Sprint (Kids te cu 14 aña) unda nan lo mester landa 375 meter, core bicicleta 10 kilometer y finalisa cu 2.5 kilometer core na pia.

Den e categoria di Junior & Adulto Male, e distancianan recori lo ta un tiki mas. Aki cada atleta lo mester landa un total di 750 meter, core bicicleta pa 20 km y finalisa e competencia cu un 5 km careda na pia.

Por ultimo den e categoria Female Open 15+, aki e tri-atletanan femenino mester landa  750 m, despues core bicicleta un total di  20 km y finalisa nan careda na pia cu un recorido di 5 km.

 

Un danki sigur na Lotto, e Loteria di Aruba pa medio di Comision di Subsidio cu ta subsidia  e evento di Guardian Group Sprint Triathlon organisa pa Aruba Triathlon Association.

Leave a Reply

Top