Habitante preocupa: Unda e departamentonan concerni a keda?! Awa sushi creando peliger di salud pa habitantenan di Sero Patrishi

Ami ta un habitante di Sero Patrishi disgusta cu e falta di atencion cu departamentonan concerni tin pa cu e situacion anti-higienico rib’e caminda publico.

 

Ta asina cu e proyecto di “embeyecemento” di Gobierno no a duna mucho fruto den e bario di Sero Patrishi, mirando su estado actual. A manda planta matanan y pone bakinan cu sinceramente nunca a yuda pa lanta su imagen.

 

Pa basta tempo caba un mata planta cerca di e casnan a wordo kita y a laga atras un buraco grandi yen di awa cu no ta seca. Constantemente e awa ta presente te cu awor e ta sushi, berde, y peligroso p’e bestianan cu bebe for di dj’e.

Sin menciona e criadero di sangura cu esaki ta produciendo y asina causando un menasa pa salud di hende.

 

M’a notifica e departamentonan concerni, e. o. GKMB na 5853325 y DOW na 5284700, pero no tin reaccion di un ni e otro. Ya dos siman a pasa cu mi ta yamando y nada ta wordo haci.

Sero Patrishi en berdad ta mustra di ta un di e barionan mas lubida rib’e lista di GKMB, DOW y Gobierno mes.

 

Mi kier sa ken ta e persona of compania encarga cu tin e deber di cumpli cu e trabou aki.

E situacion, cu por medio di e potretnan adhunto ta mustra chikito, por crece den un problema grandi si no tuma accion.

 

Ta spera cu e publicacion aki por yuda lanta e departamentonan concerni for di soño y asina brinda e asistencia necesario pa evita un caso di malesa manera e. o. e tan popular Zika crece den nos bario. Un problema cu ningun habitante a causa, sino esnan encarga cu a ranca e mata y laga e buraco yen di awa.

Top