Habitantenan Caya Ruby impresiona cu bishita di Prome Minister den nan bario

Prome Minister Mike Eman hunto cu personal di diferente departamento di Ministerio di Asunto General tabata den bario di Caya Ruby unda habitantenan a keda impresiona cu e bishita di e mandatario.

Caya Ruby ta uno cu casnan relativamente nobo y habitantenan en general ta contento cu e infrastructura cu nan a haya, camindanan asfalta cu asera di klinkers cu ta refleha loke nan a inverti den construccion di nan casnan.

 

“Pero ultimo tempo e falta di luz a causa poco problema, ya cu delincuentenan ta haya caminda pa cana destruyendo auto y otronan ta trata di kibra den casnan,” sra. Maria de Visser, un habitante di e bario a expresa.

Pa algun habitante, manera Joselin Trimon, tabata masha agradabel di por a cana cu Prome Minister Eman den e bario y scucha si e personanan aki tin algun preocupacion.

Loke cu a resalta den mayoria t’e scuridad cu e bario nobo aki a bin ta biba den y cu diahuebs anochi lo mira un cambio den esaki ora cu cuminsa pone luz.

 

Otro punto t’e efectonan di yobida. Esaki ta riba e parti di camindanan cu no ta asfalta ainda y tambe e acumulacion di sangura, pa cual e funcionarionan di KGMB presente mesora a tuma accion pa mira con por yuda e habitantenan.

“Nos no mester mucho, iluminacion, asfalta camindanan di santo y yuda elimina e sanguranan,” sra.Trimon a bisa.

Prome Minister Eman a admiti cu e bario, unda famia ta mantene nan area bunita, tin algun aña caba pidiendo pa iluminacion.

 

Ya caba Gobierno a asfalta un gran parti di e camindanan y lo percura cu Serlimar lo recoge sushi, unda cu sanguranan ta acumula, principalmente cu e yobida grandi cu Aruba a bin ta hayando.

Mirando cu e habitantenan, principalmente e grandinan a bin ta expresa nan preocupacion p’e scuridad cu nan ta biba aden, haciendo nan hopi vulnerael pa ladronnan, a dicidi di hiba e programa “Luz den Bario” p’e bario aki.

Diahuebs, 19 di januari, den oranan di anochi Prome Minister Mike Eman den forma simbolico ta sende e prome luz LED di caya dilanti e cas no. 18.

 

Otro siman ta sigui cu instalacion di algun punto nobo den Caya Ruby cu ta conta cu mas o menos 100 cas, y unda cu tur habitante lo sinti e efecto di e caya ilumina.

E camindanan cu ta di santo ainda, lo wordo poni den e programa pa wordo asfalta, Prome Minister Eman a sigura e habitantenan.

Top