Habitantenan contento cu luz den bario di Gabinete Mike Eman II: E felicidad y trankilidad a yega na San Fuego

E reaccion di habitantenan di Calabas, Ponton, Boegoeroei, Moko, San Miguel of San Fuego ta igual durante e ceremonia di cendemento di luz nobo den bario: alegria y trankilidad.

Esaki ta loke cu Gabinete Mike Eman II cu e vision di Prome Minister Eman kier hiba den tur bario di Aruba.

“Nos lo no descansa te ora cu trankilidad y felicidad yega na casnan den tur skina di Aruba”, e mandatario a bisa un biaha mas diahuebs ultimo na San Fuego.

 

A pesar di un agenda pisa di trabou, atencion pa e pueblo y e bario ta keda prioridad di e mandario. Despues di a cana den dia pa informa habitantenan di yegada di luz, den oranan di anochi, un biaha mas Prome Minister Eman tabata na San Fuego ora cu e prome luz a wordo cendi

 

San Fuego ta un di e barionan mas bieu di Aruba y siman pasa a cuminsa pone luz bou alegria y cu speranza pa mas trankilidad di e ciudadanonan. Pa Ricardo van den Berg, kende a haci di San Fuego su bario mas di 40 aña pasa tabata cana cu un sonrisa grandi riba su cara.

“Pa hopi aña nos a spera luz. Mi mes tin mas di 40 aña cu mi a bin a biba aki bou. For di e tempo ey nos a firma pidiendo pa luz. Mi ta contento cu porfin e dia a yega y cu pasenshi tur cos ta logra. Mi ta gradici Prome Minister pa loke el a haci pasobra anochi ora cu mi cana hasta boa mi ta trapa,” el a bisa den un forma chistoso brasando e mandatario yen di alegria.

Esaki ta e mesun pensamento cu tin cerca Alexander Dubero, kende a bisa cu e ta algo grandi pa cual e ta gradici Prome Minister Eman y cu e sigui cu e programa den otro barionan.

 

Pa Marianne Havelaar, kende tin casi 8 aña den e bario, esaki tabata un sorpresa grandi. Mainta Prome Minister Eman a cana den bario pa informa cu ta bay pone luz y den oranan di anochi e prome luz a wordo cendi caba.

“Anochi ora cu bo yega cas, ta manera bo ta canando den grot den e parke dor di e scuridad. Awe cu luz ta un diferencia grandi.”

 

E prome luz a wordo cendi net schuin dilanti e cas di Jaqueline Werleman, kende a splica cu esaki ta un ruta uza hopi dor di esnan cu ta practica ciclismo of ta jog.

Den oranan di anochi e caminda di San Fuego ta wordo hopi uza dor di e grupo aki pero tambe e muchanan di bario anochi kier keda mas tempo pafo, pero mayornan tin miedo dor di e falta di iluminacion. Mas ainda pasobra e ta un bario aleha.

“Awe nos ta hopi contento pasobra Prome Minister a corda riba nos. E luz ta haci un diferencia den nos bida diario. P’esey mi kier bisa danki na Mike cu el a corda riba nos”, el a bisa.

 

E programa Luz den Bario ta un vision di Prome Minister Mike Eman cu el a cuminsa implementa na aña 2013 cu cooperacion di su colega Minister Mike de Meza encarga cu Asuntonan di Utilidad. E ta basa riba un peticion cu e mandatario tabata haya den e caminatanan semanalmente cu e ta haci den barionan.

Leave a Reply

Top