Habitantenan di Pos Chikito contento cu trabou di AVP pa e bario

Fin di siman tras di lomba partido AVP a cuminsa den grandi cu su campaña pa eleccion Parlamentario dia 22 di september. Tabatin presentacion di e prome candidato nobo rib’e lista berde, Clayton Croes, pero ambe a cuminsa pa hisa bandera y e prome bario tabata AVP.

E Gobierno di asigntura berde a haci hopi trabou pa pueblo, pa barionan.

 

Un di e proyectonan grandi ta Green Corridor ta pasa den e bario di Pos Chikito, cu despues di varios decada a mira un adelanto grandi. Esaki ta algo cu e habitantenan ta aprecia masha hopi y a gradici lider di partido Mike Eman pa esaki durante partimento di bandera y sticker.

E comentarionan ricibi na e casnan unda a pasa ta cu e habitantenan ta sumamente orguyoso di e infrastructura cu a wordo poni.

 

“Nos ta hopi orguyoso y contento cu e apoyo ricibi pa esaki”, tabata comentario cu lider di partido a duna despues di a tende e elogionan. Un di e ciudadanonan aki tabata Gabriela Geerman, kende tambe a hisa bandera na su cas.

“Sinceramente mi ta hopi conento cu e proyecto Green Corridor, principalmente esun cu ta pasa den nos bario. E cambio den infrastructura a embeyece nos cas y a hisa su balor.

Berdad el a tarda un poco, mi ta compronde, pero wak e resultado awo: una beyeza.

Mi ta contento cu e trabou. E ta un cambio, ohala tur caminda na Aruba por wordo drecha di e forma aki. Aworaki nos tin un tiki mas di privacidad y nos tin un walkway super bunita.

Ami sigur ta contento.” El a gradici Gobierno di Aruba pa e bon trabou.

 

Otro habitante feliz ta Simon Ras, kende despues di 35 aña bibando den e bario ta mira un cambio grandisimo, un adelanto y modernisacion di e bario.

“Mi ta hopi contento cu e trabou cu a wordo haci den Pos Chikito. Green Corridor ta un tremendo proyecto. El a trece un cambio aki. Antes nos tabatin solamente santo, awo nos tin asfalt, acera, luga di staciona auto, nos tin tur cos”, Ras a bisa.

 

A finalisa e dia na cas di Marcelino Vrolijk, kende ta conoci pa a cambia di e partido geel pa berde na 2009. Lider di partido a splica e atardi aki cu “e tempo ey Marcelino a haya e critica. Semper ta corda cu pa e motibo di BBO el a bira AVP.

“Nos a kita mita di e BBO y ora cu nos a bay den dialogo cu gremionan sindical y comercial, nan a bisa nos cu e efecto di esaki no a yega cerca e ciudadanonan. E ora ey nos a pone reparatietoeslag riba salario pa cumpli cu e otro mitad. P’esey mi ta bisa: Marcelino nos a cumpli debidamento cu bo y cu pueblo”, el a termina bisando.

Top