Habitantenan di San Miguel a celebra yegada di luz den bario na grandi

Instalacion di luz den cayanan di San Miguel a trece un alegria grandi pa e habitantenan. Prome Minister Mike Eman tabata presente hunto cu su colega Paul Croes, pa comparti e momento aki, esta celebra cu e programa “Luz den Bario” a yega San Miguel.

 

Awendia iluminacion ta algo cu habitantenan rond Aruba ta desea mas cu tur cos y a wordo señala tambe dor di habitante Anthony Ras, kende a bisa “cu esaki ta un bon proyecto cu Prome Minister Mike Eman a bini cu ne. E ta trece, banda di claridad tambe, siguridad den tur e barionan y ta permiti e muchanan awo por hunga un rato mas largo pafo.”

 

Na San Miguel tin varios famia grandi ta biba, e. o. e famia di mama di e bon conoci basebolista Sidney Ponson. Sra. Emy Figaroa a expresa alegria pasobra awo e bario ta bay tin suficiente iluminacion y cu luz LED cu ta duna mas claridad, manera nan a experencia na momento di instalacion di e prome luz den e bario. Nan ta 12 ruman di cual 10 ta na bida y casi tur ta biba den e bario aki.

“E celebracion aki a trece un union den e bario y nos ta sinti alegria grandi awe nochi”, e habitante a bisa despues cu e prome luz a keda cendi.

 

E ta un opinion cu ta wordo comparti dor di Nancy Perez, kende a bisa cu awor e por cana tur anochi den forma trankil cu su cacho sin trompica riba e caminda scur.

“Nos ta hopi agradecido cu San Miguel a bini na remarca pa haya luz. E ta algo cu nos tabatin mester di dj’e,” sra. Perez a expresa.

 

E habitantenan di San Miguel pa celebra e hecho cu nan bario a haya luz, a organisa un celebracion cu a conta hasta cu musica di caha di orgel di Nelson Sprock.

“Luz no a yega den bario pa motibo di eleccion, pero door di e bon Gobernacion. Nos ta biba cerca di e pueblo y ta scucha nan”, Minister Paul Croes a expresa e atardi aki.

 

E programa Luz den Bario ta algo cu a cuminsa for di final di aña 2012. Despues di e prome fase a haci un analisis y a yega na e conclusion cu mester cambia tambe tur e luznan bieu di caya y pone luznan LED.

 

Prome Minister Eman a haci un apelacion na su coleganan pa coopera pa e barionan cu ta biba den scuridad tambe haya puntonan di iluminacion nobo.

Asina a wordo dicidi dor di Gabinete Mike Eman II cu loke ta spaar na coriente lo wordo uza pa cumpra luznan LED pa crea puntonan di iluminacion nobo. Por bisa cu den un periodo di un aña Aruba lo tin 12 mil luz LED den su cayanan instala.

Top