Hans Biesheuvel di Ondernemend Nederland: “Mi ta feliz y contento di por presencia apertura di Qredits na Aruba”

Hans Biesheuvel, fundador di di Ondernemend Nederland, a hunga un rol importante den establecimento di e instituto Qredits naAruba, tabata presente na momento di e lansamento oficial diamars ultimo na MFA Noord. Qredits ta un fundacion non-profit cu ta facilita micro financiamento na entrepreneurs y start ups pa cuminsa nan propio negoshi.

 

“Mi ta sintimi hopi feliz y contento di ta para aki awe, pasobra hunto cu Prome Minister Eman y su conseheronan nos a traha duro pa logra yega na e momento aki”, Biesheuvel a cuminsa su discurso den presencia di Prome Minister Mike Eman, Minister di Asuntonan Economico y Comunicacion Richard Arends, CEO Qredits Elwin Groenevelt y demas invitadonan.

 

Entrepreneurship ta un yabi masha importante pa un sociedad. Biesheuvel a papia di e importancia pa guia aspirantenan debidamente prome cu nan cuminsa cu nan propio negoshi cual sigur lo conduci na bon resultadonan. E mes, segun el a conta, tabatin e honor di coach algun empresario y den e proceso aki e mes ta siña aspectonan nobo di haci negoshi. Esaki ta loke ta haci e diferencia entre Qredits y banconan.

 

Papiando di un acontecimento special na apertura di Qredits na Aruba, Biesheuvel a pone hopi enfasis riba e hecho cu Qredits no ta un rival of competencia di banconan y esaki a wordo splica tambe den un encuentro cu miembronan di ATIA.

 

Bayendo bek den tempo, Biesheuvel a recorda cu e base pa establecimento Qredits na Aruba a wordo poni na Brazil ora cu hunto cu Prome Minister Mike Eman nan a participa den un Mision Comercial di Reino cu tabata encabesa pa Rey Willem Alexander.

“Eynan por a sinti e importancia di un bon relacion den Reino, e balor agrega di por traha hunto. E balor agrega ainda mi ta mira cu tey. Mi ta sigur cu Qredits ta un paso bunita cu a tuma pa demostra e balor agrega di traha hunto. Mi mes ta sinti e ilusion di por haci hopi mas hunto, riba diferente otro tereno y bayendo pafo di Reino unda cu tin hopi oportunidad.”

 

Biesheuvel no ta directamente envolvi den e maneho pero si den e supervision. El a desea e instituto tur clase di exito den su operacion na Aruba. El a conseha e futuro empresarionan pa presenta nan plannan, “no pensa nunca cu boso negoshi ta demasiado chikito of boso no tin experencia. Qredits ta hustamente e organisacion cu ta yuda boso pasa over di e obstaculonan ey. Probecha pa tuma e oportunidad pa realisa e soño cu hopi aña caba boso tin”, el a bisa e futuro empresarionan presente.

Top