Hasta mula mancaron a manda Hulanda cu coca!

WILLEMSTAD – E siguiente caso di loke a pasa cu un mula mancaron a demostrá cu den mundo di traficacion di droga no tin limite ni consideracion p’e victimanan cu doñonan di droga ta uza pa manda nan droga Hulanda.

Ne momentonan aki tin un homber mancaron di 37 aña kende nan a plak casi dos kilo di cocaina den su carsonsiyo y barké manda Hulanda caminda mesora cachó anti-droga a bula riba dje y e ta será fo’i dia 25 di februari di 2015.

 

Ya nan a condené un biaha caba den pasado pa pasa droga, pero el a apelá e castigo y e biaha aki Corte Supremo a condené na 18 luna di prison di cual 8 condicional.

Awor e detaye tristo mes ta bin: E homber t’asina malo cu e tin cu pasa su castigo riba cama di hospital caminda e tin cu haña tratamento special pa su curpa no sali na herida.

E t’asina tanto paralisá cu cada dos ora mester bòlter su curpa pa evitá cu e ta haña herida.

 

Fo’i ora Corte a lesa su historia, nan a constatá cu no por sera e homber den prison, pasobra e ta malamente paralisá na su lomba. E ta sufri di loke nan ta yama ‘dwarslaesie’.

Pa colmo promé cu el a cay na Hulanda, nan a yega di condená caba un biaha pa transporte di droga.

Abogado di e mula a pidi pa lage liber, pasobra no tabata su intencion pa bin Hulanda cu droga, pero ta un muher cu ta cuidé a bistié un boxershort cu mas cu 4 kilo di cocaina.

Dia el a yega Schiphol 25 februari 2015 seladornan a haña 4 paki cu hunto a pisa 2.4 kilo di cocaina.

 

E condenado ta gaña asina malo cu el a conta Hueznan cu ta na marshe na Corsou el a cumpra e boxershort pa 200 euro.

Ta fo’i ki dia ta paga mercancia na euro na Corsou e Huez lo a pensa. Di dos mentira: Un muher cu e no sa ken e ta, tabata cuidé na Corsou pasobra e ta mancaron y t’e muher ey a bistié e carsonsiyo. El a mira e carsonsiyio, pero no a ripará nada particular. El a kere cu ta carsonsiyo cu gèl!

 

Hueznan no a come e cuento, pasobra ta regla internacional cu un pasahero den avion mester sa ki tin den su ekipahe, den e caso aki den su carsonsiyo, pasobra e ta responsabel.

Corte Superior a dicta un sentencia di 18 luna di cual 10 luna condicional, pero awor e problema ta bin: Prison no ta ekipá pa cuida hende mancaron.

Pa colmo e homber ta usa marihuana legal pa controlá dolor y ta sufri di depresion pe condicion cu e ta den.

Logico, cualkier hende lo sufri di depresion estando mancaron y será den prison.

 

Corte no a bay di acuerdo cu e abogado defensor pa lage bay numa, pasobra e droga cu el a trece ta causa masha pena na Hulanda. Pa colmo el a yega di cay un biaha caba cu droga na Hulanda.

E tin suerte mes cu durante su detencion, prison lo duné tratamento na lugar di seré den cèl.

Como ‘palo tras di porta’ òf ‘stok achter de deur’, e ta haña un periodo di prueba di 2 aña.

Leave a Reply

Top