HC Adidas Aruba a desvela e bala oficial pa FIFA Worldcup ‘18

Durante un ceremonia chikito na HC Adidas Aruba, situa den Renaissance Mall, e bala oficial cu lo wordo usa durante FIFA Worldcup 2018 na Russia a wordo desvela.

E bala a yega Aruba un dia anterior, y hunto cu AVB a mustra e bala pa prome biaha p’e publico di Aruba.

Durante e ceremonia, a papia Jonathan Wever, Marketing Manager di HC Adidas Aruba, cu a splica un poco tocante e historia y tecnologia di e bala.

 

Di parti di AVB, a papia sr. Koopman, kende ta Director Tecnico di AVB, y el a splica un poco su rol den e federacion, y con e ta mira e situacion actual di Futbol na Aruba. El a papia hopi bunita di futbol na Aruba, lagando sa bon cla cu e desaroyo ta sumamente positivo y e futuro ta mustra di bay ta hopi interesante.

 

Na palabra nos a haya sr. Richard Dijkhof tambe, kende ta Presidente di AVB, kende a gradici HC Adidas Aruba p’e ceremonia y a toca riba e gran relacion entre AVB y HC Adidas Aruba. Presente den publico nos a haya varios deportista y miembronan di directiva di varios team di futbol aki na Aruba, cu a mustra hopi entusiasmo p’e diseño y “looks” di e bala nobo.

 

E bala cu a wordo desvela ta yama e Telstar 18. E bala aki ta hopi particular, como e t’e “reinvention” di e prome bala blanco cu patterns preto, cu a wordo desvela den aña 1970 dor di Adidas.

E prome Telstar a revoluciona con futbol a crece for di aña 1970, como el a yuda popularisa e deporte.

 

Danki n’e diseño ingenuo di Adidas e tempo ey, e bala por a wordo mira hopi mihor riba veld durante wega, y mas aun p’esnan cu ta wak e wega riba television.

Na HC Adidas Aruba, lo tin disponibel algun bala special di Telstar 18, cu lo tin un “NFC chip”” den e bala, unda lo por conecta cu e bala via un app riba bo smartphone. Esaki lo duna informacion valioso pa cualkier futbolista, cu lo kier mira p.e. e trayectora of speed di e bala despues di a skop e.

 

Den number di Monique Janssen, Directora di HC Adidas Aruba, a gradici e miembronan di prensa presente, y deportistanan cu a presencia y e publico cu a yega asina join nan den e desvelacion di e bala Telstar 18.

E bala ta obtenibel na HC Adidas Aruba pa cual ta invita pueblo pa pasa serca nan, p’asina mira e bala, y mesora take a look tambe den e store.

 

 

 

 

Leave a Reply

Top