Hedging actual ta finalisa fin di aña awor; No sa ainda, si lo sigui hedge, e ta un decision di e.o. Parlamento di Aruba

Ainda WEB Aruba N.V. tin parti di su fuel-oil mara na un prijs, cu ta 42% cu ta conoci como hedging cu lo finalisa pa fin di aña aki. Asina CEO di WEB Aruba N.V. Luis Oduber a duna di conoce.

Naturalmente te ainda no tin decision kico lo bay sosode, despues di esey. Hecho ta cu a keda acorda cu prome cu cualkier decision lo tin dialogo cu e stakeholdernan concerni y tambe lo mester haya aprobacion di Parlamento.

 

Si decision mester cay cu lo no tin hedging mas, Aruba lo keda na merced di prijs di fuel-oil manera e ta riba mercado internacional.

Hecho ta cu tin diferente manera pa haci hedging y naturalmente e lesnan di pasado mester sirbi como experiencia con cos mester wordo haci y kico no.

 

Ta bon pa splica un biaha mas, cu hedging ta manera un seguro cu bo ta cumpra pa un prijs, unda e.o. por paga un tarifa y ta stipula un maximo. Loke nifica cu si e prijs subi, e no por bay mas halto na loke ya a keda stipula, pero e lo laga e parti abao habri. Esta si p.e. e prijs di fuel-oil baha bay te na 10 dolar, ta probecho so Aruba lo saca di dje.

 

GAS

Te ainda no por papia mucho di e tuberia di gas entre Venezuela y Aruba, cual a firma un acuerdo, pero te awor nada a ser haci.

Ta depende atrobe na ki prijs Aruba lo haya e gas. Despues mes ta keda pendiente garantia di suministro.

Aruba lo keda depende riba un liña di gas, y si algo pasa cu e liña ey of si Nicolas Maduro lanta loco aya banda y sera e suministro aki, y kico e ora ey?

 

E consecuencia ta grandi, pasobra aki na Aruba, nos mester bay na switch atrobe pa fuel-oil (diesel) cu lo a hopi mas caro.

Como tal, segun Luis Oduber, cu tin diferente scenario cu WEB Aruba ta studiando y esakinan tambe ta bay rekeri mas invesion ainda.

Ora cu ta papia di sostenibilidad, pa WEB Aruba N.V. esaki nifica cu e no mag di bay a costo di e cliente, kende lo bay na paga mas na tarifa.

 

 

Top