Hefe interino di Buro MFA, sr. Omar Harms a introduci manager di MFA Savaneta, sra. Kimberly Boekhoudt

Prome Minister Mike Eman y su Gabinete ta hopi contento cu avance den ehecucion di e vision pa edificionan MFA, edificionan multifuncinal, cu ta trece servicionan, incluyendo Hulpbestuurskantoornan y otro servicionan importante pa pueblo, den un edificio moderno, confortabel p’e cliente y adecua p’e trahador.

MFA Noord y Paradera, ta den operacion y a demostra nan importancia y efectividad.

MFA Savaneta ta den e fase final di construccion y ta premira cu apertura por tuma lugar mey-mey di e aña aki.

 

Omar Harms, Hefe interino di Buro MFA a splica cu despues di a finalisa cu trabounan di construccion y preparacion pa cuminsa opera MFA Noord y Paradera, nan team sigui di biaha cu trabounan pa realisacion di MFA Savaneta.

E prome MFA pariba di brug ta keda cla dentro di poco y ta situa panord di stacion di gasolin di Savaneta.

Segun plan construccion ta finalisa final di juni y inmediatamente ta cuminsa cu mudamento di e servicionan cu ta bay tin oficina den e edificio, incluyendo Hulpbestuurskantoor Savaneta.

 

“Mi por bisa cu e proyecto ta canando bon y a yega momento pa nombra e manager di MFA Savaneta cu a keda den persona di Kimberley Boekhoudt.”

E manager a cuminsa traha pa cuminsa prepara pa unabes construccion keda finalisa, MFA Savaneta por cuminsa operacion mas liher cu ta posibel.

Segun sr. Hamrs tin basta trabou di preparacion, e.o. creacion di un Klankbordgroep y prepara documentonan di TOR (Terms of Reference) pa maneho di e cantina.

Tambe ta trahando riba informa bario riba e funcion di e facilidad multifuncional aki.

 

Bisiñanan por duna sugerencia di servicionan of loke nan kier mira den e MFA of cambionan cu mester wordo haci prome cu e MFA bay den operacion.

“E intencion ta cu tur aspecto di operacion mester keda regla prome cu e apertura tuma lugar mey-mey di e aña aki,” Omar Harms a bisa.

Despues di Savaneta, e team di MFA ta bay enfoca riba preparacion di facilidad multifuncional di Santa Cruz, cu ta bay keda construi banda di oficina di rijbewijs.

 

 

Top