Hipólito “Eddy” Ras #7 POR: Stimula salario minimo y elemina impuesto indirecto riba productonan cu ta influencia costo di bida lo tin efecto positivo pa comunidad

E esencia di salario minimo pa POR ta un “Entery Level Income”. Un salario minimo ta un salario cu ora un persona hoben cuminsa traha, e minimo cu e lo gana. E meta di salario minimo no ta pa un persona bay biba decadas cu mesun salario minimo.

Actualmente un impresa ta paga 25 % di winstbelasting. Pa stimula aumento di salario minimo sin cu mester bin cu inflaccion, POR lo brinda comerciantenan un taza di winstbelasting mas abou si nan prueba cu den nan payroll, cu nan a duna aumento rib’e salario minimo. P. e. 20 % di winstbelasting en bes di 25 %, segun Eddy Ras.

 

Pa medio di un estimulo fiscal ta duna comerciantenan riba nan mesun bon boluntad e escogencia pa duna aumento riba salario minimo. Asina e e salario minimo enrealidad lo bira un “Entry level income”.

Bestaansminimum (costo di bida) ta wordo influencia dor di 10 factor. E 10 factornan ta: 1. Cuminda y bebida, 2. Paña y sapato, 3. Gastonan di vivienda, 4. Acesorionan pa cas, 5. Salubridad, 6. Transporte, 7 Comunicacion, 8. Recreacion, cultura y desaroyo, 9. Educacion, 10. Otro bienes y servicionan, Ras ta splica.

Na Aruba tin un canasta basico cu ta consisti di 11 producto cu e prijsnan ta wordo stipula y controla pa Gobierno. E 11 productonan ta: aros, hariña, sucu, babyfood, lechi pa baby, koffie, te, margarina, manteca, lechi di polvo y lechi likido pa koffie.

Riba tur e productonan cu ta pertenece na e canasta basico tin cu paga impuesto indirecto (BBO / BAZV) momento di haci compras. Prijsnan cu tambe ta wordo calcula pa Gobierno ta: pisca, galiña, webo y pan blanco.

 

Si tuma un di e factornan cu ta influencia e bestaansminimum cu ta cuminda y bebida, berdura y fruta ta productonan cu no ta paga invoerrechten pero, impuesto indirecto ta wordo poni rib’e prijs momento di haci compras. Pa medio di elimina impuesto indirecto riba (cierto) factornan cu ta influencia bestaansminimum lo haci cu e bestaansminimum lo ta menos cu ta actual, Ras ta mustra.

 

Pa medio di un comunicado di CBS por mira cu na luna di juli 2017 e bestaansminimum ta pa: Un adulto Afl 2.053,-. Dos adulto y 2 yui Afl 4.311,-.

Un persona adulto cu ta gana salario minimo ta bin cu mas o menos Afl 1.650,- netto pa luna cas. Cual ta señala cu tin un diferencia di Afl 403, – mensual.

 

Rebaha winstbelasting na impresanan pa stimula salario minimo y elimina impuesto indirecto riba (cierto) factornan cu ta influencia e bestaansminimum, ta haci cu Gobierno lo tin menos entrada na impuesto. E situacion ta haci cu como Gobierno mester traha na prome lugar pa mehora e parti economico pa por tin mas entrada, Ras ta enfatisa.

Pa medio di mehora economia, ta bay tin mas variacion den empleo y cu miho salario.

Dor di crea mas empleo cu miho salario, ciudadanonan por hasi mas compras.

Pa mehora e economia POR lo:

expande turismo pa medio di fast ferry entre e islanan Aruba, Boneiro y Corsou.

introduci pilar economico nobo cu ta e curason di Fourth Industrial Revolution.

 

E combinacion di stimula salario minimo y elemina impuesto indirecto riba (cierto) factornan cu ta influencia bestaansminimum lo brinda comunidad un miho poder di compra.

Cual cu lo percura pa salario minimo y bestaansminimum yega otro.

Na mesun momento ta kita e presion cu mayornan tin cu traha mas cu un trabou pa cumpli cu nan debernan. Unda cu e mayornan tin mas tempo pa nan yiunan y lo contribui pa evita problemanan social den comunidad, Ras ta termina bisando.

Top