Hipólito “Eddy” Ras (POR): Pa medio di mehora economia por elemina impuesto indirecto riba e factornan cu ta influencia bestaansminimum

Bestaansminimum ta e suma mensual netto pa cubri costo di bida basico.

Den un comunicado di CBS di juni 2017, e bestaansminimum (costo di bida) netto mensual ta pa: Un persona adulto Afl 2.056,–. Un famia di dos adulto y dos yiu Afl 4.317,–.

Un luna tin un averahe di 4,33 siman (52 siman / 12 luna). E situacion ta señala cu pa siman e bestaansminimum pa un persona adulto ta Afl 474,83 (Afl 2056 / 4,33 siman).

Cual cu pa dia ta Afl 67.83. Empleado cu ta gana un salario minimo ta bin cu mas of menos Afl 1.650,– netto pa luna. E cifranan ta demostra cu pa luna entre salario minimo netto y bestaansminimum, tin un diferencia di mas of menos Afl 406,– (Afl 2.056 – Afl 1.650).

E diferencia di Afl 406,– ta indica, cu un persona cu ta gana salario minimo tin cu bay traha 6 dia extra pa cubri su deber y necesidad mensual (Afl 406 / Afl 67.83 = 6 dia). E scenario treci dilanti ta situacion di un adulto sin yiu pa cria, segun Eddy Ras.

 

Pa medio di raport di CBS por a mira cu tin 10 factor cu ta influencia e bestaansminimum. E 10 factornan ta: 1. Cuminda y bebida, 2. Paña y sapato, 3. Gastonan di vivienda, 4. Acesorionan pa cas, 5. Salubiridad, 6. Transporte, 7 Comunicacion, 8. Recreacion, cultura y desaroyo, 9. Educacion, 10. Otro bienes y servicionan, Ras ta splica.

 

Na Aruba tin un canasta basico cu ta consisti di 11 producto cu e prijsnan ta wordo stipula y controla pa Gobierno. E 11 productonan ta: aros, hariña, sucu, babyfood, lechi pa baby, koffie, te, margarina, manteca, lechi di polvo y lechi likido pa koffie. Riba tur e productonan cu ta pertenece na e canasta basico tin cu paga impuesto indirecto (BBO / BAZV) momento di haci compras. Prijsnan cu tambe ta wordo calcula pa Gobierno ta: pisca, galiña, webo y pan blanco, Ras ta mustra.

 

Dor di compara e factornan cu ta influencia bestaansminimum y e canasta basico, por mira e motibo dicon e diferencia entre salario minimo y bestaansminimum ta 6 dia di trabou extra pa luna. Aruba ta un pais cu mayoria di su productonan ta bini for di exterior. Esey ta haci cu si prijsnan di producto of transporte den exterior subi, e aumento ta bay tin influencia rib’e bestaansminimum, Ras ta indica.

 

Si tuma un di e factornan cu ta influencia e bestaansminimum cu ta cuminda y bebida, berdura y fruta ta productonan cu no ta paga invoerrechten pero, impuesto indirecto ta wordo poni rib’e prijs momento di haci compras.

Pa medio di elimina impuesto indirecto rib’e factornan cu ta influencia bestaansminimum, port trece e salario minimo y bestaansminimum mas den balans cu otro. Elemina impuesto indirecto riba (cierto) factornan cu ta influencia e bestaansminimum, ta haci cu Gobierno mester eherce un control fuerte riba su entradanan y su gastonan. Esey ta haci cu prome cu traha pa reduci bestaansminimum, mester traha na prome lugar pa mehora e parti economico pa por tin mas entrada, e candidato di POR ta remarca.

 

Ademas, Ras ta splica, cu pa medio di mehora economia, ta bay tin mas variasion den empleo y cu miho salario. Dor di crea mas empleo cu miho salario, cuidadanonan por haci mas compras.

E situacion menciona ta hasi cu impresanan ta bay contribui mas cu impuestonan cu nan tin cu cumpli cu nan.

Pa mehora e economia POR lo:

Expande turismo pa medio di fast ferry entre e islanan Aruba, Boneiro y Corsou;

Introduci pilar economico nobo cu ta e curason di Fourth Industrial Revolution.

 

Ras ta sigui splica cu e pilar economico nobo lo ta enfocando riba companianan high tech, E-business, startups, business incubators, companianan fintech y otro actividadnan economico inovativo basa riba tecnologia nobo.

Pa ta atractivo pa introduci un pilar economico nobo lo:

Introduci incentivonan fiscal;

Stimula creacion di un fondo di inversion;

Brinda e infrastructura necesario cu e meta pa desaroya un sector economico nobo.

 

Si no traha prome rib’e parti economico, como Gobierno bo ta maneha un pueblo riba un manera iresponsabel. Iresponsabel paso e situacion financiero di Aruba no ta esun mas stabiel nan e momentonan aki. Si traha rib’e factornan cu ta influencia bestaansminimum sin crea entrada nobo ta mescos cu crea debe. Vivienda ta un di e factornan mas grandi cu ta influencia e bestaansminimum.

Na mes momento Gobierno mester traha na un manera responsabel rib’e parti financiero.

Pa medio di mehora economia, drecha e parti financiero y crea mas empleo cu miho salario, habitantena lo bay tin un miho calidad di bida y bienestar general, Ras ta termina bisando.

Leave a Reply

Top