Hoben empresario Lindy Croes di bishita cerca Prome Minister Eman

Diaranson merdia, Prome Mi nister Eman a ricibi  e empresario hoben Lindy Croes den su oficina pa gradici’e pa e evento exitoso di ‘egghunting’ cu el a organisa den caya grandi diasabra cu a pasa.

Lindy, kende ta doño di ‘Lindy Lifestyle Boutique’ a sinti su mes masha honra cu e atencion y tempo cu Prome Minister Eman a dedica na dj’e.
Banda di e atencion aprecia aki Eman a duna muestra di su gratitid regalando Lindy un replica di un casita di antes. Un gesto cu a wordo masha hopi aprecia.

Lindy a dicidi den un periodo cortico, pero cu hopi inspiracion,  organisa e evento di ‘egghunting’ ya cu el a mira cu no tabatin nada pa trece mas bida den caya grandi den fin di Semana Santa.
El a trece su idea dilanti y mesora esaki a haya acogida fuerte di e otro comerciantenan den caya grandi. Nan a coopera cu ne y e actividad tradicional di Pasco Grandi a bira un exito.

Lindy Croes, un dama entusiasma a bisa cu e ta dispuesto pa sigui organisa e evento aki otro aña atrobe of cualkier evento, pero lo desea un team mas grandi pa yud’e. Lindy no a critica y para na banda, pero a ‘pone manos a la obra’ y cu exito.

Top