Hoben graduado di Grupo 9 Formacion Social: “Awor mi kier busca un trabou y cu Dios kier, forma un famia”

Siman pasa Gian Pierre Rodriguez a ricibi su certificado como un graduado di e trayecto SVT/Formacion Social, pero ya caba su mente ta mas dilanti.

E ta entusiasma cu e potencial awor cu e tin un educacion y experiencia di trabou.

Gian Pierre t’esun di mas contento cu su otro 4 compañeronan di Grupo 9, pasobra esaki ta su di dos intento den Formacion Social y finalmente el a logra. Mes contento tambe ta su señora mama y sobrinanan cu a compañe n’e ceremonia di graduacion.

 

E hoben di 21 aña ta bin di e distrito di Noord y ta conta con e mes a dicidi cu e ta bay p’e reto un biaha mas.

“Tabata un decision di mi mes dor cu mi no a sigui scol mas; awor mi ta contento cu mi a haci esey,” Gian Pierre ta bisa.

Despues di a kita di scol sin gradua, el a purba haci trabounan aki’ aya, pero ta den Formacion Social el a wak un perspectiva nobo y positivo.

“E ta algo pa mi mes y sin un papel den mi man, mi no por haci nada. Awor mi kier sigui mehora mi mes, busca un trabou y cu Dios kier, forma un famia.” Gian Pierre ta buscando actualmente un trabou. E ta gusta area di carga y maneho di deposito.

 

Gian Pierre ta wak Formacion Social como algo hopi bon. E ta wak e programa cu Prome Minister Mike Eman a cuminsa cu ne varios aña atras, como un ayudo pa hopi cu kier bay dilanti.

“Nan ta siña bo hopi disciplina,” e ta bisa. Adicional n’e entrenamento militar pa 4 luna, e participantenan ta sigui varios estudio y despues ta core stage na un compania local.

“E parti mas dushi ta cu nos a siña traha den grupo mihor; e parti dificil tabata e prome luna cu nos no por a sera cabes hunto,” asina e ta conta.

 

Den su caso, Gian Pierre a pasa su entrenamento militar pa despues haya cursonan di Hulandes, Ingles, Papiamento, matematica, computer, desaroyo general, motivacion y comportacion.

El a core stage den e departamento di mantencion di Divi Aruba Phoenix Beach Resort.

Mientras cu Grupo #9 di Formacion Social a finalisa, Grupo #10 ta na mitar di nan trayecto y inscripcion ta habri pa Grupo #11 cu ta start na fin di maart proximo.

Pa mas informacion por bishita e pagina di Facebook ‘Formacion Social – SVT’, yega personalmente n’e oficina na Mariniers Kazerne na Savaneta of yama na 522-5352/ 522-5545.

Top