Hoben menor di edad a tira veneno den orange juice di su wela cu tabata kinipie na su brasa

Pa Ministerio Publico e acusacionnan di asesinato y intento di asesinato / maltrato pisa contra un mucha muhe di 16 aña ta legalmente proba. Pero su mannan ta mara ya cu na momento cu e damita aki a wordo deteni,e tabatin 15 aña. Pues e castigo maximo cu e por pidi p’e ta 12 luna di detencion hubenil, kitando e tempo cu e tin den detencion caba.

Ta trata di un hecho cu a tuma luga aña pasa y esun envolvi ta un mucha muhe, naci na Jamaica, di 16 aña (su edad awo) acusa di a tira veneno di djaca den orange juice cu el a duna su Grandma (tanta grandi), cu kende e tabata biba. E motibo ta supuestamente cu e wela tabata discuti hopi cune y tabata kinipie na su brasa.

E caso tabata basta bruha pasobra e acusado hoben aki no kier a papia na Polis y tampoco den Corte. Parce cu “nan” a bise cu si e papia e ta bay cera hopi aña. Pero finalmente el a bisa Huez cu e ta dispuesto pa papia, pero sin presencia di prensa. Ya caba como cu tabata trata di un caso contra un menor di edad, na momento di comete e delito, e lo mester a wordo trata porta cera. Sinembargo a permiti prensa pa ta presente pero sin menciona nomber di e acusado ni su situacion personal. E Unico cu por a compronde di su situacion personal, den e rekisitorio di Fiscal, ta cu e tabatin un hubentud yena di problema.

For di prome instancia tabatin indicacion cu ta e hoben a tira e veneno, ya cu el a bay cumpra e juice, e mes no a bebe di e juice (e ta bisa cu si), y a pone di dje den frigidaire y ora cu e tanta a yama for di Colombiabisa cu e wela ta mehorando, e hoben a rabia. Segun un familiar a declara, el a dal riba su pia y bisa “ayno”.

Durante tratamento di e caso a bin saca afo cu e motibo pakico e hoben  no  kier a papia tambe ta pasobra ora cu un tanta a puntre kico realmente a pasa encuanto e veneno, sin cu e tabata sa, nan a graba y filma kico el a conta nan. Entre otro cu un señora  na un parada di bus a forse cumpra e veneno y tire den un bebida di Sister Mary, manera nan tabata yama su wela.

E version cu Polis a recoge ta bisa cu e hoben, algun dia prome a bay na un supermercado banda di su cas y a puntra nan pa veneno di djaca (rato). Nan a mustre un cu ta “korrels” corra. Pero e tabata kier specificamente di puiro cu ta disolve lihe. Tur su movecionnan aki a wordo graba riba e video di e supermercado. E idea mes, a base di informacion acumulsa, ta mustra cu prome cu el a drenta e cura di cas, el a kita e seyo di e paki juice y a habri e saco cu veneno pa basha esaki den e paki di orange juice. Eybou Polisnan a haya un korrel corra y e seyo di e paki juice. Den labamano di cushina tambe a haya un korrel.

Na cas e paki juice a wordo habri, y el a basha un koppi pa e wela, pa e nieto y pa su mes. Esun di dje, el a warda den frigidaire pa e fria bon, mientras cu el a sigui haci cas limpi. Loke a sosode despues ta cuadra den tur declaracion. E wela a bisa cu e juice ta smaak straño, manera awa. E wela a bay basha un glas mas y a constata bolitanan roos (ora cu e veneno keda den likido e ta cambia di color) y a bay mesora na e supermercado bek cu e paki juice. E gerente a mustre cu no ta posibel pasobra tur e paki juicenan ta seya y a  mustre e otronan. Como nan a cuminsa sinti malo tambe a bay directamente IMSAN, unda cu a trata nan di biaha pa veneno. Tur dos tabata saca hopi, pero e wela a keda mas afecta pasobra el a bebe mas di e juice. Nan tur dos a saca, inclusive e korrelnan corra / roos.

Loke cu a pasa cu e wela despues, ta cu momento cu a dun’e un remedi pa su stoma, el a haya un paro cardiaco  pa cual e mester a wordo reanima. Despues a hibe hospital y dos luna despues a wordo manda Colombia, unda el a keda interna den Cuido Intensivo te cu december. Despues cu su situacion a mehora, a mande Aruba y interna den hospital. Door di un complicacion, dokternan mester a pone un tubo pa manda oxigeno pa su pulmonnan pa e por hala rosea. Na momento cu e tabata interna den hospital aki, slijm a pega den e slang , y e oxigeno no por a yega su pulmon pa e hala rosea, y a bin fayece.

 

 

 

Leave a Reply

Top